Kórshiles Reseıde otandyq tasymaldaýshylar shekteýlerge tap boldy - depýtat
ASTANA. KAZINFORM – Májilis depýtaty Bolatbek Najmetdınuly kórshiles Reseı aýmaǵynda qazaqstandaq júk tasymaldaýshylar qıyn jaǵdaıǵa tap bolyp jatqanyn málim etti.
- Qazaqstandyq tasymaldaýshylar Reseıde jappaı shekteýge túse bastady. Keıbireýleri qamaýǵa alynǵan. On myńdaǵan halyqaralyq júrgizýshiler men kompanııalarlarǵa qaýip tónip tur. Osy máselege baılanysty meniń telefnyma kóbisi qońyraý shalyp, eldiń túkpir-túkpirinen SMS-ter jetip jatyr. Keıingi kezde bizdiń júrgizýshiler men halyqaralyq tasymaldaýmen aınalysatyn kompanııalar Reseı Federatsııasynyń aýmaǵynda bolý merzimi boıynsha jappaı shekteýlerge tap boldy, - dep jazdy B. Najmetdınuly áleýmettik jelidegi paraqshasynda.
Onyń aıtýynsha, kórshi el № 115-FZ Federaldyq zańyna túzetýler engizilgennen keıin (2024 jylǵy 8 tamyzdaǵy túzetýlermen), vıza erejesinde vızasyz kelgen sheteldik azamattardyń Reseıde kúntizbelik jyl ishinde 90 kúnnen aspaıtyn merzimde bolýy qarastyrylǵan. Bul norma halyqaralyq avtomobıl tasymaldarynyń erekshelikterin eskermeıdi. Bizdiń júrgizýshiler basqa eldiń aýmaǵynda jeke sebeptermen emes, eńbek mindetterin oryndaý úshin júr. Degenmen, jańa talaptar olardy is júzinde reseılik zańnamany buzatyndarǵa aınaldyrdy.
- Kóbisi osy jaǵdaıǵa tap boldy. Reseı men Belarýs aýmaǵynda bolǵan ýaqyt birge eseptelip otyr, Belarýs arqyly tranzıttiń ózi Reseıde júrgen dep qarastyrylady. Munymen qosa, EAEO eliniń Eýropa odaǵymen shekarasyndaǵy, sondaı-aq Reseı-Qazaqstan shekarasyndaǵy kóp kúndik kezek saldarynan Qazaqstan, Ózbekstan, Qyrǵyzstan jáne óńirdegi basqa da elderdiń júrgizýshileri ruqsat alýdy kútip, birneshe kún turýǵa májbúr. Osy ýaqyttyń barlyǵy jalpy 90 kúndik lımıtke engizilgen, - deıdi depýtat.
Osy oraıda ol EAEO aıasyndaǵy ózara is-qımyl máselelerin qadaǵalaıtyn QR Premer-mınıstriniń orynbasary Serik Jumanǵarınge resmı úndeý joldaǵanyn aıtty. Budan bólek, tasymaldaýshylarǵa aldyn ala jaýap berip, olardy qorǵaý tetikterin ázirleý úshin Syrtqy ister mınıstrligi men Іshki ister mınıstrligine tıisti málimetter usynylǵan.
Budan buryn habarlanǵandaı, Qazaqstan men Reseı shekarasyndaǵy ótkizý beketterinde kólikter jınalyp qalǵan bolatyn. Memleket basshysynyń tapsyrmasy aıasynda QR Kólik mınıstrligi men Shekara qyzmetiniń ókilderi Reseı Federatsııasyna shyǵýdy qamtamasyz etetin kólik ótkizý beketterin baryp kórdi. Kólik mınıstrliginiń baspasóz qyzmeti jaǵdaıdyń bulaısha qalyptasýyna Reseı Federatsııasy tarapynan baqylaý sharalarynyń kúsheıtilgeni de yqpal etip otyrǵanyn málim etken edi.