«Kórshiler kóshti, biz qaldyq»: Atyraýda apatty úıdiń turǵyndary baspana máselesin sheshýdi suraıdy
ATYRAÝ. KAZINFORM – Atyraý qalasyndaǵy Aleksandr Stahanov kóshesi, 1A mekenjaıyndaǵy apatty úıdiń turǵyndary jańa baspanaǵa kóshirýdi talap etti. Olardyń aıtýynsha, turǵyn úıdiń jaǵdaıy jyldan-jylǵa nasharlap, ómir súrýge qaýipti bolyp barady.
Bul segiz páterli turǵyn úı shamamen 70 jyl buryn salynǵan. Nysan 23 jyl buryn apatty dep tanylǵanymen, turǵyndar áli kóshirilmegen. Úıdiń qabyrǵalary sógilip, shatyry tesilgen, ishki bóligi kógergen. Turǵyndar ǵımaratta tyshqandar kóp ekenin jáne sanıtarlyq jaǵdaıdyń nasharlaǵanyn aıtady.
Keıbir turǵyndar osyndaı jaǵdaıǵa baılanysty baspanalaryn tastap ketýge májbúr bolǵan. Al alty balanyń anasy Elmıra Dilmuhanova úıde kishkentaı balalarmen turý qıyn ekenin jetkizdi. Onyń aıtýynsha, túnde egeýquıryqtar shyǵyp, balalardyń kıimderin jáne azyq-túlikti búldiredi. Sonymen qatar jylý júıesi jıi jarylyp, ystyq sý qubyrlary birneshe ret isten shyqqan.
Turǵyndardyń málimetinshe, kóshirý máselesi birneshe jyldan beri sheshilmeı keledi. ıÝlııa Lysaktyń aıtýynsha, turǵyndar 2012 jyldan beri túrli mekemelerden ýáde alyp keledi.
– Bizge 2012 jyldan beri kóshiremiz dep ýáde beredi. 2024 jyly qala ákiminiń qabyldaýynda boldyq. Ol máseleni 2025 jyly sheshemiz dedi. Biraq áli nátıje joq. Qujattardy eki ret tapsyrdyq. Bizdi «qurylys kompanııasy keledi» dep shyǵaryp salady. Osylaı birneshe jyl ótti, al kórshi úıler kóshirildi. Biz qalyp qoıdyq, - dedi ıÝlııa Lysak.
Atyraý qalalyq turǵyn úı-kommýnaldyq sharýashylyǵy jáne turǵyn úı ınspektsııasy bóliminiń sektor meńgerýshisi Gúljamal Joldasovanyń aıtýynsha, buryn turǵyndar men qurylys kompanııasy arasynda kelisim bolǵandyqtan, ákimdik aralaspaǵan.
– 2024 jyly turǵyndardyń biri qajetti qujattardy jınaqtady. Úı apatty dep tanylǵany týraly qorytyndy bar. Qazir jol kartasyna ózgeris engizý jumystary júrgizilýde. Osy úılerdi qosyp, keıin buzý máselesin sheshemiz, - dedi Gúljamal Joldasova.
Resmı málimetterge sáıkes, qazirgi ýaqytta Atyraý oblysynda 195 apatty úı esepte tur. Onyń 90-ǵa jýyǵy Atyraý qalasynda ornalasqan. Mamandar mundaı úılerdiń turǵyndaryn kezeń-kezeńimen kóshirý jumystaryn júrgizip jatqanyn habarlady.
Buǵan deıin qala ortalyǵynda ornalasqan apatty dep tanylǵanyna 15 jyl bolǵan úıde adamdar áli turyp jatqanyn jazǵan edik.
