Kórshisin uryp óltirgen 37 jastaǵy aqmolalyq ustaldy
KÓKShETAÝ. QazAqparat - Aqmola oblysynda kórshisin uryp óltirgen 37 jastaǵy er adam ustaldy, dep habarlaıdy QazAqparat tilshisi oblystyq polıtsııa departamentiniń baspasóz qyzmetine silteme jasap.
Vedomstvonyń málimetinshe, 2021 jylǵy mamyrdyń 11-de saǵat 07:07 shamasynda Kókshetaý qalalyq polıtsııa basqarmasy jedel basqarý ortalyǵynyń «102» pýltine 37 jastaǵy jergilikti turǵyn habarlasyp, óz páteriniń jatyn bólmesinen kórshisiniń denesin tapqanyn aıtqan.
Er adamnyń sózinshe, kórshisi oǵan shaı surap kelgen. Sol kezde onda dene jaraqattary bolǵan. Tańerteń oıanǵanda er adamnyń kóz jumǵanyn kórip, birden polıtsııaǵa habarlasýdy sheshken.
Oqıǵa ornyna barǵan tártip saqshylary 53 jastaǵy er adam túngi saǵat bir shamasynda kóptegen jaraqattardan qaıtys bolǵanyn anyqtady.
Medıtsınalyq saraptamanyń qorytyndysyna sáıkes, er adam «bastyń, keýdeniń, ishtiń ishki aǵzalardyń zaqymdalýy, baýyrdyń jyrtylýy jáne travmatıkalyq shoktyń» saldarynan kóz jumǵan.
«Jedel-izdestirý sharasynda polıtsııa polıtsııaǵa habarlasqan 37 jastaǵy jergilikti turǵynnyń osy qylmysqa qatysy baryn anyqtady. Er adam jasaǵan qylmysyn tolyq moıyndady. Ol ishimdik ishý barysynda týyndaǵan janjal kezinde kórshisin uryp, keıin tósegine jatýǵa ketip qalǵan. Tek tańerteń kórshisiniń ólgenin anyqtady. Er adamǵa qatysty Qylmystyq kodekstiń 99 babynyń 1 bóligi «Adam óltirý» boıynsha sotqa deıingi tergeý sharalary júrgizilýde. Kúdikti ýaqytsha ustaý oqshaýlaǵyshyna toǵytyldy», - dedi vedomstvodan.
