Kórshiles memleketter elimizdegi Shardara qoımasyna kóp kólemde sý jiberip jatyr
«Ótken jyldyń jeltoqsan aıynda Qyrǵyzstandaǵy Toqtaǵul sý qoımasynan elimizdegi Shardara sý qoımasyna kóp kólemde sý jiberildi. Bul Qyrǵyzstandaǵy elektr energııasynyń tapshylyǵymen baılanysty. Negizinen arnaıy kelisim boıynsha Ózbekstan Qyrǵyzstanǵa elektr energııasyn berýi tıis edi. Alaıda, ózbek tarapy óz elindegi tapshylyqqa baılanysty belgilengen mejeni oryndaı almady. Sondyqtan Qyrǵyzstan Toqtaǵul sý qoımasynan bizge kóp kólemde sý jiberip, nátıjesinde odan energııa aldy», - dedi Danııar Saǵadıev.
Onyń aıtýynsha, sońǵy eki kúnde Ortalyq Azııa elderine jaýǵan qardyń kólemi kóp boldy. Tıisinshe, Tájikstan, Ózbekstan jáne Qyrǵyzstandaǵy sý qoımalary tolǵan.
«Osyǵan baılanysty 3 memleket ózderiniń sý qoımasyndaǵy sýdyń kólemin azaıtý jáne elektr energııasyn óndirý maqsatynda ony Qazaqstanǵa jiberip jatyr. Qazir sýdyń kelý jyldamdyǵy sekýndyna 1 000 tekshe metrdi quraıdy. Jalpy, buǵan deıin Shardaraǵa sekýndyna 925 tekshe metr sý quıylatyn. Qardyń erý qaýipin de umytpaǵan jón. Eger qar tez erip ketse, onda Shardaraǵa baǵyttalatyn sý kólemi sekýndyna 1 500 tekshe metrge deıin jetýi múmkin. Degenmen dál qazirgi sátte Shardaraǵa jaqyn mańda ornalasqan eldi mekenderi sý basý qaýpi joq», - dep toqtaldy Danııar Saǵadıev.
Mınıstrlik ókilderiniń boljamyna sáıkes, Shardaraǵa keletin sý kólemi aqpan aıynda azaıýy múmkin. Óıtkeni, Ózbekstanda kóktem erte shyǵady. Sáıkesinshe, egistik jerlerdi aldyn ala ylǵaldandyrý bastalady. Al qazir Shardara sý qoımasy taǵy 2 mlrd 200 mln tekshe metr sýdy qabyldaýǵa qaýqarly.
