Kórshiler Qazaqstanǵa qyzyǵa qaraıdy - mınıstr Ábdiraxmanov

ASTANA. QazAqparat - QR Syrtqy ister mınıstri Qaırat Ábdiraxmanov Tuńǵysh Prezıdent kúnine arnalǵan xalyqaralyq konferentsııa ne úshin uıymdastyrylǵanyn túsindirdi, dep xabarlaıdy QazAqparat tilshisi.

"Halyqaralyq kezdesýler barysynda bizdiń kórshiles elderimiz, jalpy álemniń basqa memleketteri tarapynan Qazaqstannyń damý úlgisine, jańǵyrý sharalaryna shynaıy qyzyǵýshylyqtyń bar ekenin, onyń udaıy artyp kele jatqanyn nyq senimmen aıtýǵa tolyq negiz bar. Búginde táýelsiz Otanymyz álemge óziniń baıandy saıası turaqtylyǵymen, keshendi ekonomıkalyq damýymen, baı mádenıetimen keńinen tanymal. Birikken Ulttar Uıymynyń Qaýipsizdik keńesine múshe bolyp saılandyq. Sırııadaǵy qandy janjaldy retteý boıynsha Astana protsesin qabyldaýdamyz. "Bolashaq energııasy" degen asa ózekti taqyrypta EKSPO-2017 Halyqaralyq kórmesin ótkizdik. Osyndaı qomaqty tabystarymyz Qazaqstannyń álemdik arenada óziniń laıyqty ornyn tapqanyn kórsetedi", - deıdi mınıstr Ábdiraxmanov.

Onyń aıtýynsha, elimizdiń qazirgi jetistikteri - kópultty Qazaqstan xalqy men Memleket basshysy Nursultan Nazarbaevtyń salıqaly saıasatynyń nátıjesi. Sol sebepti QR Syrtqy ister mınıstrligi men QR Parlament Májilisi búgingi konferentsııany uıymdastyrýdy uıǵardy.

Aıta keteıik, elordada "Jańa jahandyq bolmystaǵy Qazaqstannyń jańǵyrý modeli" taqyrybynda xalyqaralyq parlamenttik konferentsııa bastaldy. Atalǵan shara QR Tuńǵysh Prezıdenti kúnine arnalyp otyr. Májiliske Reseı, Ázerbaıjan, Túrkııa, Ózbekstan, Armenııa, Italııa, Ispanııa, Qytaı, Birikken Arab Ámirlikteri, Bolgarııa, Majarstan jáne taǵy basqa barlyǵy on bes eldiń delegattary qatysýda. Budan bólek, AQSh-tyń sarapshylary da keldi. Konferentsııanyń basynda QR Parlament Májilisiniń tóraǵasy Nurlan Nyǵmatýllın "Nazarbaev modeliniń" qupııasyn ashyp berdi.