Kórshiler baqylaýy: Almaty oblysynda 48 turǵyn marapattaldy
TALDYQORǴAN. QazAqparat - «Kórshiler baqylaýy» baǵdarlamasynyń nátıjesinde1600 astam quqyq buzýshylyqtyń joly kesildi, dep habarlaıdy QazAqparat tilshisi.
Almaty oblystyq Polıtsııa departamenti baspasóz qyzmetiniń málimetinshe, atalǵan baǵdarlamanyń negizgi maqsaty quqyq buzýshylyqqa múldem tózbeýshilik qaǵıdatyn qalyptastyrý, turǵyndardyń zań buzýshylyqqa jaýapkershiligin arttyrý bolyp tabylady.
Quqyq qorǵaý baǵytyndaǵy qoǵamdyq uıymdar men turǵyndardyń qoǵamdyq tártipti saqtaýǵa jáne quqyq buzýshylyqtardy boldyrmaýǵa belsendi atsalysýy úshin oblystyq Polıtsııa departamenti tarapynan keshendi sharalar qabyldanýda.
Qazirgi ýaqytta Almaty oblysynda 366 qoǵamdyq qurylym quqyq qorǵaý baǵytynda qyzmet etedi. Atalǵan uıymdardyń quramynda 1500 jýyq múshe bar. Bıyl osy uıymdardyń kómegimen 146 ákimshilik quqyq buzýshylyq áshkere boldy. Tártip saqshylary qoǵamdyq uıym ókilderimen qoıan-qoltyq jumys istep, qoǵamdyq tártipti qamtamasyz etýde.
Sonymen qatar, elimizdiń qoldanystaǵy zańnamasyna sáıkes, quqyq qorǵaý organdaryna qoldaý kórsetip, kez kelgen zań buzýshylyqtyń aldyn alǵan azamattardyń áreketi organ tarapynan kótermelenetini belgili.
Bıyl oblystyń bas polıtseıi qoǵamdyq tártipti qamtamasyz etýge qosqan súbeli úlesi úshin 48 turǵyndy marapattap, syılyqtar tabystady.
