Kórshi memleketter múddesin toǵystyrǵan beldeý
ASTANA. QazAqparat - Memleket basshysy Nursultan Nazarbaev Qytaı Halyq Respýblıkasyna resmı sapary barysynda mamyrdyń 14-15 kúnderi Beıjińde ótken «Bir beldeý - bir jol» atty halyqaralyq yntymaqtastyq forýmynyń ashylý saltanatyna qatysty.
Álemniń 29 eliniń memleket basshylary men premer-mınıstrleri, BUU Bas hatshysy, halyqaralyq delegatsııalardyń, dúnıejúzilik qarjy uıymdarynyń jetekshileri bas qosqan alqaly jıynda Jer shary halqynyń 45 paıyzyn qamtıtyn asa iri jobanyń damý joldary, saýda-ekonomıkalyq yntymaqtastyq, ónerkásiptik ınvestıtsııalar, energetıka men resýrstar, qarjylyq qoldaý máseleleri kún tártibine qoıyldy.
Forýmǵa qatysýshy memleketter basshylarynyń «Tyǵyz yntymaqtastyqqa arnalǵan saıası birlesken qyzmet» taqyrybynda ótken dóńgelek ústel jıynynda sóz sóılegen Elbasy Nursultan Nazarbaev QHR tóraǵasy Sı Tszınpınniń Eýrazııada ejelgi Jibek jolyn jańa, zamanaýı formatta qaıta jandandyrý ıdeıasy álemde kórinis alyp otyrǵan saıası, ekonomıkalyq jáne gýmanıtarlyq daǵdarystarǵa berilgen ýaqtyly jaýap ekenin atap ótti.
- Paternalızm men saıası astary bar sanktsııalardy qoldaný sharalary mıllıondaǵan adamdardyń ekonomıkalyq belsendiligin tómendetip, ómir súrý deńgeıine áser etti. Sonyń nátıjesinde, sońǵy jyldary álemdik ekonomıka men saýdada bosańdyq pen quldyraý baıqala bastady.
Osyndaı jaǵdaıda halyqaralyq kooperatsııany yntalandyrý úshin álem jańa jetekshi kúshtiń qajettiligin ótkir sezinýde, - dedi Qazaqstan Prezıdenti.
Nursultan Nazarbaev «Bir beldeý - bir jol» bastamasy jańa geoekonomıkalyq paradıgma qalyptastyrýǵa múmkindik beretinin atap ótti. Onyń tabysty iske asýy, jınaqtap alǵanda, 4,4 mlrd turǵyndy qamtıtyn elderge paıda ákeledi.
Memleket basshysy «Bir beldeý - bir jol» óńirlik kooperatsııasynyń jańa modeliniń myqty tustaryna erekshe toqtaldy.
- «Birlese damý arqyly turaqtylyqqa qol jetkizý» ustanymy búginde ondaǵan eldiń ekonomıkalyq múddesine saı keletin halyqaralyq yntymaqtastyqtyń tartymdy formasy bolyp sanalady. Osyǵan oraı, Jibek jolynyń naqty sulbasy kórine bastaǵan qazirgi kezde bul makroóńirlik kooperatsııanyń birlesken strategııalyq úılesimi qajet. Sondaı-aq Jibek joly bastamasyn iske asyrý tutas bir óńirlerdi, sonyń ishinde Ortalyq Azııany jahandyq kontekste jańa turpatta tanytýǵa múmkindik beredi, - dedi Qazaqstan Prezıdenti.
Nursultan Nazarbaev Ortalyq Azııa álemniń eń iri naryqtary arasyndaǵy basty dánekerge aınalyp, qaıtadan strategııalyq mańyzǵa ıe bolǵanyn atap ótti.
Sonymen qatar, Prezıdent Eýrazııalyq ekonomıkalyq odaqtyń osy protsestegi mańyzdy róline toqtaldy.
- «Úlken Eýrazııanyń» birtutas ekonomıkalyq keńistigin qurý ıdeıasy jańa mánge ıe bolýda. Jibek jolynyń ekonomıkalyq beldeýi Shanhaı yntymaqtastyq uıymy, Eýrazııalyq ekonomıkalyq odaq jáne Eýropalyq odaq platformalaryn órkendeýdiń birtutas óńirlik aýmaǵyna utymdy túrde toǵystyra alady, - dedi Memleket basshysy.
Sonymen qatar Memleket basshysy jańa Jibek joly boıynda ornalasqan elderdiń azyq-túlik qaýipsizdigin qamtamasyz etý maqsatymen aýyl sharýashylyǵy kooperatsııasyn damytýdyń mańyzdylyǵyn atap ótti.
Sondaı-aq, Nursultan Nazarbaev ınnovatsııalyq jáne ǵylymı-tehnıkalyq damý salasyndaǵy yntymaqtastyqty tereńdetýdi usyndy.
Sóz sońynda Elbasy «Bir beldeý - bir jol» ıdeıasyn oıdaǵydaı iske asyrý úshin múddeli elder arasynda ózara senimniń ornyǵýy, olardyń teń quqyqtylyqqa jáne jan-jaqty yntymaqtastyqqa daıyn bolýy mańyzdy ekenin atap ótti.
