Kórshi eldermen transshekaralyq ózender boıynsha kelissóz jalǵasady - Ekologııa mınıstrligi

ASTANA. QazAqparat – Sýarmaly egistikterde sý únemdeý tehnologııalaryn engizýge qatysty memlekettik qoldaý jónindegi jumysty jalǵastyrý kerek. Bul týraly Úkimet otyrysynda QR Ekologııa, geologııa jáne tabıǵı resýrstar mınıstri Serikqalı Brekeshev aıtty, dep habarlaıdy QazAqparat tilshisi.

«Jalpy, aldyn ala qabyldanǵan sharalardyń arqasynda bıyl ońtústik óńirlerde vegetatsııalyq kezeń shyǵynsyz ótti. Kelesi jyldyń vegetatsııalyq kezeńine daıyndyq jumystaryn atqarý úshin arnaıy jospardy bekitip, bastapqy jumystarǵa kirisip kettik. Sonymen qatar, Aýyl sharýashylyǵy mınıstrligimen jáne oblys ákimdikterimen birlesip, qantar aıynan bastap fermerler arasynda tıisti túsindirý jumystaryn júrgizýdi josparlap otyrmyz», - dedi S. Brekeshev.

Osy oraıda ol Aýyl sharýashylyǵy mınıstrligi sýarmaly jerlerde sý únemdeý tehnologııalaryn engizýdi memlekettik qoldaý jónindegi jumysty jalǵastyrýy tıis ekenin aıtty. Munymen qosa, sýarmaly jerler boıynsha monıtorıngti kúsheıtý kerek.

«Óz kezeginde Ekologııa, geologııa jáne tabıǵı resýrstar mınıstrligi shekaralas eldermen transshekaralyq ózender boıynsha yntymaqtastyq jónindegi is-sharalardy, kanaldardy jóndeý baǵytyndaǵy jumystardy jalǵastyrady», - dedi mınıstr.

Budan buryn habarlanǵandaı, búgin Úkimet otyrysynda QR Premer-Mınıstri Álıhan Smaıylov Ekologııa mınıstrligine transshekaralyq sý máselesine qatysty tapsyrma berdi.