Kórshi elderdiń sý qoımasy Qazaqstannyń ońtústigine qaýip tóndirip tur
ASTANA. QazAqparat - Kórshi elderdiń sý qoımasy Qazaqstannyń ońtústigine qaýip tóndirip tur. Bul týraly búgin Úkimettiń selektorlyq rejimdegi otyrysynda Ońtústik Qazaqstan oblysynyń ákimi Janseıit Túımebaev aıtty, dep habarlaıdy QazAqparat.
«Oblysta sý tasqynynyń aldyn alý jumystary josparǵa sáıkes júrgizilýde. Kúndelikti sý qoımalary men ózen jaǵdaıy qadaǵalaýǵa alynyp, monıtorıng júrgizilýde. Degenmen, oblysta eń ózekti máselelerdiń biri - transshekaralyq Syrdarııa ózeni boıynda ornalasqan kórshiles elderdegi sý qoımalaryndaǵy sý mólsheri. Bul bizdi alańdatýda. Qazirgi tańda kelgen málimetter boıynsha Toqtaǵul sý qoımasynyń jobalyq syıymdylyǵy 19,5 mln tekshe metr bolsa, qazirgi jaǵdaıda 99 paıyzǵa tolyp tur. Qaıraqumnyń jobalyq syıymdylyǵy 3 mln 800 myń tekshe metr bolsa, qazirgi jaǵdaıda 86 paıyzǵa, ıaǵnı 3 mln 281 myń tekshe metr tolǵan», - dedi ol.
Oblys basshysynyń QR Aýyl sharýashylyǵy mınıstrligi Sý resýrstary komıtetiniń málimetterine súıengen deregine sáıkes, Shardara sý qoımasyna sekýndyna 4 myń tekshe metr sý kelý boljamy bar. ıAǵnı, bul Shardara sý qoımasyna qaýip týǵyzady. Sebebi Shardara sý qoımasynyń sýdy tómen tastaýǵa arnalǵan gıdrotehnıkalyq júıeleriniń múmkinshiligi sekýndyna 2315 tekshe metrd ǵana quraıdy.
«Birinshiden, ótken jyldyń tájirıbesin eskere otyryp, Shardara sý qoımasyn keminde 2018 jyldyń qańtar aıyna deıin tranzıttik rejimde ustaýdy, ekinshiden qaýip tóngen jaǵdaıda kórshiles Qyrǵyzstan, Tájikstan, Ózbekstan respýblıkalarymen kelisim arqyly kelgen sýdyń mólsherin azaıtýǵa jáne Arnasaı oıpatyna sý jiberý máselesin Úkimet deńgeıinde sheshýdi, úshinshi Shardara sý qoımasynan josparly túrde Qyzylqum oıpatyna sekýndyna 2100 tekshe metr apatty sý tastaý qurylymy qurylysyn salýdy usynamyz. Bul jańa usynysymyz. Óıtkeni, 4000 tekshe metr sý kelgen jaǵdaıda sekýndyna qalǵan 1685 tekshe metr sý Shardara sý qoımasyn 15-20 kúnniń ishinde toltyryp tastaıdy. Tórtinshi, qys mezgilinde qaýipti jaǵdaı tóngen kezde Shardara sý qoımasynan Qyzylorda oblysyna tastalatyn sý mólsheriniń kólemin ulǵaıtyp, retteý kerek. Jalpy, qazirgi tańda oblysta sý tasqyny qaýpi joq. Bul aldymyzdaǵy kezeńderge arnalǵan jobalar», - dedi Janseıit Túımebaev.
«Bul óte kúrdeli másele. Sol sebepti Asqar Isabekuly (QR Premer-Mınıstriniń orynbasary - Aýyl sharýashylyǵy mınıstri Myrzahmetov) bul máseleni óte muqııat baqylap otyrý qajet», - dedi Úkimet basshysy Baqytjan Saǵyntaev.
