Kórshi elderden urlanǵan kólikterdi qaıtarýdyń joly jeńildetildi
NUR-SULTAN. QazAqparat – Parlament Senatynyń jalpy otyrysynda «2005 jylǵy 25 qarashadaǵy Táýelsiz Memleketter Dostastyǵyna qatysýshy memleketterdiń avtokólik quraldaryn jymqyrýǵa qarsy kúrestegi jáne olardy qaıtarýdy qamtamasyz etýdegi yntymaqtastyǵy týraly kelisimge ózgerister engizý týraly hattamany ratıfıkatsııalaý týraly» Zańy qabyldandy, dep habarlaıdy QazAqparat tilshisi.
Bul hattamaǵa 6 eldiń ishki ister mınıstrleri qol qoıdy, olardyń arasynda Reseı, Tájikstan, Belarýs, Qazaqstan, Qyrǵyzstan, Moldova bar.
Hattamanyń negizgi maqsaty – urlanǵan avtokólik ıeleriniń quqyqtaryn qorǵaý.
«Búginde TMD kelisimine sáıkes, eldermen shekaramyz ashyq. Osyny paıdalanyp, keıbir adamdar zań buzýshylyqtar jasaıdy. Mysyly, 2005 jyldan bastap osy kezge deıin urlanǵan 223-dan astam kóliktiń tek 30 paıyzy elge qaıtarylǵan. Óıtkeni, suraý salý normalarynyń kemshilikteri bar. Osy kemshilikterdi joıý úshin qujatqa jańa normalar engizildi. Endi ereje boıynsha suraý salýdy oryndaýǵa bir aı ýaqyt beriledi. Sondaı-aq, suraý salý boıynsha aqparat usynýdan bas tartý úshin naqty negiz qajet», - dedi QR Іshki ister mınıstri Erlan Turǵymbaev.
Sonymen qatar, Hattamada:
- jol-kólik, órt jáne tabıǵı apattan zardap shekken avtokólikter týraly málimet berý;
- keden organdarymen aqparat almasý;
- 1 jyl ishinde suraýy joq avtokólik, qaı jerde anyqtalsa, sol memlekettiń menshiginde qaldyrý máseleleri qarastyrylǵan.
«Búginde Táýelsiz Memleketter Dostastyq elderiniń arasynda avtokólikterdi urlaý problema bolyp tur. Osy Kelisimdi bekitý - azamattardyń quqyǵyn qorǵap, urlanǵan kólikterdi qaıtarýdyń jolyn jeńildetedi. Osy Zańdy qabyldaý teris áleýmettik-ekonomıkalyq jáne quqyqtyq saldarǵa ákep soqpaıdy, qosymsha qarjy talap etpeıdi», - dedi mınıstr.
