Kórshi elden ákelingen ónimderden salmonella taıaqshalary tabyldy
ORAL. QazAqparat - Reseıden ákelingen ónimderden salmonella jáne ishek taıaqshasy toby tabyldy, dep habarlaıdy QazAqparat tilshisi.
BQO qoǵamdyq densaýlyq saqtaý departamentiniń bólim basshysy Gúlbaqyt Naýrzalınanyń aıtýynsha, bıylǵy naýryz aıynda 29 saýda ornynan 111 taǵam ónimi satyp alynyp, zerttelgen. Sanıtarlyq-epıdemıologııalyq saraptama qorytyndysyna sáıkes 26 taǵam óniminiń Keden odaǵy tehnıkalyq reglamentteriniń talaptaryna saı kelmeıtini málim boldy.
Sáıkessizdiktiń kópshiligi, ıaǵnı 22-si Keden odaǵy óndirýshilerinen tabylsa, sonyń 20-sy Reseı, ekeýi Belarýs eliniń ónimi bolyp shyqty. Sol sekildi mundaı sáıkessizdik Ýkraına, Serbııa, Frantsııa jáne AQSh sekildi alys-jaqyn shetelderdiń ónimderinen de anyqtaldy.
Sáıkessizdiktiń basym bóligi (22 ónim) ónimniń tańbalanýyna qatysty. Atap aıtqanda, sút (irimshik, qaımaq, balmuzdaq) jáne qus ónimderiniń (tartylǵan et, jumyrtqa, jartylaı fabrıkat, pashtet, shujyq ónimderi, qosymsha ónimder) belgisinde memlekettik jáne orys tilinde aqparat kórsetilmeıdi. Qaptamasy ashylǵannan keıingi saqtaý erejeleri (maı, irimshik, súzbe ónimi, tartylǵan et), Keden odaǵyna kiretin elder naryǵynda ónim aınalymynyń biryńǵaı belgisi kórsetilmegen (qus eti), daıyndalǵan kúni eki túrli bolyp jazylǵan (balapan-broıler jartylaı fabrıkaty, qosymsha qus ónimderi).
Mıkrobıologııalyq qaýipsizdik kórsetkishteri boıynsha Samara qalasyndaǵy «Ametıst» JShS shyǵarǵan «Kotletnyı» muzdatylǵan tartylǵan etinen patogendi salmonella jáne ishek taıaqshasy tobynyń bakterııasy anyqtaldy.
Sonymen qatar ishek taıaqshasy tobynyń bakterııasy (kolıforma) Saratov qalasyndaǵy «Saratovskıı molochnyı kombınat» JShS óndirgen «Dobraıa býrenka» maısyz irimshiginen jáne Samaradaǵy «Fabrıka Laktomelııa» JShS shyǵarǵan Sokýrsk trakty men vanılın ıisi bar tátti massadan tabyldy. Munyń ekeýi de - sút ónimderi.
Oǵan qosa tutynýshylardy aldaý, taýardyń tutyný qasıetterine nemese sapasyna qatysty jańylystyrý deregi belgili boldy. ıAǵnı sanıtarııalyq-gıgıenalyq saraptama nátıjesinde atalǵan sút ónimderinde maı-qyshqyl quramy boıynsha sáıkessizdik anyqtaldy jáne 3 qus óniminde eki túrli daıyndalý kúni kórsetilgen.
«Osy sáıkessizdikterdi joıý maqsatynda jospardan tys eki tekseris uıymdastyrylyp, 9 buzýshylyqty joıý týraly uıǵarym daıyndaldy. Anyqtalǵan derekter boıynsha ónim óndirýshige qatysty sharalar alý úshin BQO ishki ister departamentine QR Ákimshilik quqyq buzýshylyq kodkesi 190-babyna sáıkes tutynýshylardy aldaý máselesin qaraýǵa materıaldar joldandy», - dedi G.Naýrzalına.
