Qorshaýdyń qulaýy kezinde zardap shekken oqýshyǵa áskerı dárigerler ota jasady
QR QM baspasóz qyzmetiniń habarlaýynsha, 2016 jylǵy qańtardyń ortasynan bastap Mádına Maratqyzy sol jaq san jilik súıeginiń sozylmaly osteomıelıti, qurt jegen túri dıagnozymen QR QM Bas áskerı-klınıkalyq gospıtalinde statsıonarlyq em qabyldaýda.
Aldyn ala daıyndyqtan keıin 2016 jyldyń 3 aqpanynda onyń tobyǵyna sekvestrnekrektomııa otasy jasaldy. Osteomıelıttik sekvestrdi alyp tastady, sebebi, súıek talshyǵy irindeı bastaǵan.
Qazirgi ýaqytta ol otadan keıingi em-dom qabyldap jatyr. Jaǵdaıy qanaǵattanarlyq. Tobyǵy jazyla bastaǵan kezde protezdeýge múmkindik bolady.
Zardap shekken qyzdy emdeý 2014 jyldyń qarashasynda Taldyqorǵan qalasynyń oblystyq aýrýhanasynda bastalǵan bolatyn. Ol jerde oǵan sol jaq jilinshiginiń ampýtatsııasy kóleminde bastapqy ota jasaldy. Nátıjesinde jilinshiginiń birneshe ret aýtodermoplastıkasy (terini almastyrý) jasaldy. Jara baıaý jazyla bastady. Operatsııadan keıingi osteomıelıttiń órshýine baılanysty 2015 jyldyń 13 naýryzynda sol aýrýhanada sol jaq úlken san jiligi súıeginiń qaıta ampýtatsııasy, ıaǵnı, onyń qaıtalanbaly kesilýi (rezektsııa) jasaldy. 2015 jyldyń 25 qyrkúıeginde Almaty qalasynyń 4 qalalyq klınıkalyq aýrýhanasynda da qaıta ampýtatsııalaý jasaldy.
Saldarynan naýqastyń sol jaq jilinshigi júıesiniń sozylmaly osteomıelıti, qurt jegisi paıda boldy. Osyǵan baılanysty, zardap shekken qyzdyń anasy medıtsınalyq kómek kórsetilýi týraly QR Qorǵanys mınıstrliginiń Bas áskerı-medıtsınalyq basqarmasyna ótinish bildirdi. 2016 jyldyń 12 qańtarynda boıjetken gospıtalge jatqyzyldy.
Esterińizge sala ketsek, oqıǵa 2014 jyldyń sońynda oryn aldy. Mádına Maratqyzy Taldyqorǵan qalasyndaǵy áskerı gospıtaldiń beton qorshaýynyń qulaýy saldarynan zardap shekti. Ol kezde bankte shot ashyldy. Oǵan QR Qorǵanys mınıstrliginiń áskerı qyzmetshileri, vedomstvolyq baǵynysty qurylymdar men bólimsheler materıaldyq kómek retinde ózderiniń bir kúndik jalaqylaryn esepshotqa aýdardy. Sondaı-aq zardap shekken qyzdyń otbasyna qarjylaı kómek kórsetildi.
Jaraqat alǵan sátten bastap áskerı-medıtsınalyq mamandar zardap shekken qyzdyń emdelýine belsene atsalysty, jetispegen dári-dármekti jetkizý júrgizildi.Odan basqa, zardap shekken qyzdy birinshi qabattaǵy páter ispetti bólmege ornalastyrdy, dep habarlaıdy QR QM baspasóz qyzmeti.