Qorshaǵan ortany lastaǵany úshin aıyppul salýdan góri, ondaı kompanııalardyń qyzmetin toqtatqan tıimdi ‑ N. Áshimov
ASTANA. Qarashanyń 16-sy. QazAqparat /Qanat Mámetqazyuly/ ‑ Qorshaǵan ortany lastaǵany úshin aıyppul salýdan góri, ondaı kompanııalardyń qyzmetin toqtatqan tıimdi áser beredi.
Búgin QR Parlamenti Májilisinde ótken Úkimet saǵatynda QR Qorshaǵan ortany qorǵaý mınıstri Nurǵalı Áshimov osylaı málim etti, dep habarlaıdy QazAqparat.
«Bizdiń mınıstrliktiń maqsaty ekologııalyq tólemder úshin salyq salyp, aıyppuldardy óndirý emes. Halyq densaýlyǵyna qolaıly orta qalyptastyrýǵa, «taza aýa men taza sý» máselesin tıimdi sheshýge jaǵdaı jasaýǵa tıispiz. Jalpy, meniń oıymsha tabıǵatty paıdalanýshylar úshin qorshaǵan ortany lastaǵanyna baılanysty aıyppuldar salý tıimsiz, talapty oryndamaǵan olardy jaýyp tastaý kerek. Áıtpese, olardy zań arqyly yntalandyrý nemese májbúrleý qajet. Máselen, ilespe gazdardy kádege jaratý úshin qoıylatyn tútik‑qondyrǵynyń baǵasy 80 mln. dollardy qurasa, ondaı gazdy jaqqany úshin aıyppul ary ketse 1-2 mln. dollar shamasynda. Sondyqtan, keıbir kompanııalar ekologııany oılaǵannan góri aıyppulmen qutylǵysy keledi», dedi mınıstr.
Onyń aıtýynsha aldaǵy jyldan bastap ondaı aıyppul saıasaty shekteledi. «Sondyqtan da qorshaǵan ortany lastaǵan kompanııalar ne túbegeıli jabylady, ne bolmasa tabıǵatty qorǵaý júıesin qalpyna keltiredi», dedi mınıstr.
Esterińizge sala keteıik, 2008 jyly bıýdjetke túsken ekologııalyq tólemder somasy 74,7 mıllıard teńgeni qurasa, onyń 8,5 mıllıard teńgesi aıyppul esebinen bolatyn. Al aǵymdaǵy jyldyń 9 aıynda ekologııalyq tólemderdiń jalpy somasy 76,5 mıllıard teńgeni, onyń ishinde aıyppul mólsheri 10,8 mıllıard teńgeni qurady.
