«Qorshaǵan ortany qorǵaýdyń aqparattyq-taldaý ortalyǵy» RMK bas dırektorynyń mindetin atqarýshyǵa 24 mln. teńgeni urlady degen aıyp taǵyldy
ASTANA. 17 qarasha. QazAqparat /Marlan Jıembaı/ - Qorshaǵan ortany qorǵaý mınıstrliginiń «Qorshaǵan ortany qorǵaýdyń aqparattyq-taldaý ortalyǵy» RMK bas dırektorynyń mindetin atqarýshy K.Nuǵymanovqa qatysty is sotqa tapsyryldy.
Bul týraly búgin elordada ótken baspasóz máslıhaty barysynda QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili Murat Jumanbaı málim etti.
«Qorshaǵan ortany qorǵaý mınıstrliginiń «Qorshaǵan ortany qorǵaýdyń aqparattyq-taldaý ortalyǵy» Respýblıkalyq memlekettik kásiporny bas dırektorynyń mindetin atqarýshy K.Nuǵymanovtyń isi sotqa tapsyryldy», - dedi ol.
Resmı ókildiń atap ótýinshe, oǵan qorshaǵan ortany qorǵaýdyń aqparattyq júıesin jasaýǵa jáne damytýǵa bólingen 24 mln. teńgeni atqarylǵan jumystardy qabyldaýdyń jalǵan aktilerine qol qoıý arqyly urlady degen aıyp taǵyldy.
