Qorshaǵan ortany qorǵaý mınıstrligi ilespe munaı gazyn kádege jaratý jumystaryn odan ári jalǵastyrýy tıis - S.Ahmetov
ASTANA. 30 qańtar. QazAqparat /Marlan Jıembaı/ - Qorshaǵan ortany qorǵaý mınıstrligi ilespe munaı gazyn kádege jaratý jumystaryn odan ári jalǵasyrýy tıis.
Bul týraly búgin atalǵan vedomstvonyń alqa májilisine qatysqan QR Premer-Mınıstriniń birinshi orynbasary Serik Ahmetov aıtty.
«Qorshaǵan ortany qorǵaý, onyń sapasyn turaqtandyrý jáne jaqsartý barshalyq is. Oǵan 27 qańtardaǵy Qazaqstan Respýblıkasynyń Prezıdenti - Elbasymyz Nursultan Ábishuly Nazarbaevtyń «Áleýmettik-ekonomıkalyq jańǵyrtý - Qazaqstan damýynyń basty baǵyty» atty Qazaqstan halqyna Joldaýynda atalǵan qorshaǵan ortaǵa óz yqpalyn tıgizetin «jasyl» tehnologııalar transfertteri kýá», - dep atap ótken S.Ahmetov, bul rette, atalǵan mindetter boıynsha tıisti jumystar atqarylýy tıistigin basa aıtty.
«Birinshiden, 2011 jyly mınıstrliktiń oryndaýy úshin Memleket basshysy 10 tapsyra berip, onyń 5-eýi júzege asyryldy. Qalǵan 5 tapsyrma boıynsha jumysty jalǵastyrý qajet. Osyǵan oraı jumysty belsendirý jáne Memleket basshysynyń tapsyrmalaryn oryndaý úshin kidirissiz sheshimder qabyldaý qajet», - dedi ol.
S.Ahmetov mınıstrliktiń 2010 jyldyń qorytyndysyna arnalǵan alqa májilisinde QR Úkimet basshysynyń ilespe munaı gazyn kádege jaratýǵa arnalǵan baǵdarlamasyn munaı sektoryndaǵy kásiporyndarmen júzege asyrý baǵytynda bergen jumysyn jalǵastyrýdy qatań tapsyrdy.
Sonymen qatar káriz sýy jınalatyn Sorbulaq kóliniń ekologııalyq probelmasyn sheshý maqsatynda ǵylymı-zertteý jumystary júrgizilip jatqandyǵyn basa aıtqan ol: «Zertteý aıaqtalǵannan keıin mınıstrlik Almaty qalasynyń ákimdigimen birlesip, atalǵan problemany túbegeıli sheshýge qarjy bólý máselesin qarastyrýǵa tıisti», - dedi.
