Qorshaǵan ortany kógaldandyrý árbir otbasynyń aýlasynan bastalýy kerek - Qyrǵyz ulttyq ýnıversıtetiniń oqytýshysy
ALMATY. 22 shilde. QazAqparat - Jurtshylyqty qorshaǵan ortany kógaldandyrýǵa jumyldyrýda mektep muǵalimderiniń róli óte zor.
Almatydaǵy «Gúlstan» gúl baǵyna tájirıbe almasý maqsatynda Bishkek qalasynan kelgen J. Balasaǵyn atyndaǵy Qyrǵyz memlekettik ýnıversıtetiniń Pedagogıkalyq kadrlardy maqsatty daıarlaý ınstıtýtynyń oqytýshysy Elmıra Namatova QazAqparat tilshisine bergen suhbatynda osylaı aıtty.
«Bizdiń bul saparymyzdyń basty maqsaty - «Gúlstannyń» tájirıbesi boıynsha bilim berý mekemelerin jasyldandyrý arqyly oqýshylarǵa ekologııalyq tárbıe berýdiń pedagogıkalyq negizderimen tanysý. Óıtkeni qorshaǵan ortany jasyldandyrýda qazir «mektep - oqýshy - ata-ana» arasyndaǵy úshtuǵyrly baılanystyń róli álsiz. Oǵan bilim berý uıymdarynda bul baǵytta qajetti oqý quraldarynyń jetkiliksizdigi óz yqpalyn tıgizýde», - deıdi E.Namatova. Joǵary oqý ornynda matematıka páninen dáris beretin ol osy ýaqytqa deıin Qyrǵyzstanda qansha izdestirse de gúlder álemi týraly qyrǵyz tilinde birde-bir oqýlyq taba almapty. Jaqynda ınstıtýt kitaphanasy tartý etilgen «Gúlzar» qoǵamdyq birlestiginiń tóraıymy Gózel Quljabaevanyń qazaq tilindegi «Ósimdikter álemi» oqý-ádistemelik keshenimen tanysqan soń, avtormen baılanysqan kórinedi. Igilikti bastamanyń nátıjesin kózben kórý úshin Pedagogıkalyq kadrlardy maqsatty daıarlaý ınstıtýtynan 7 shákirtin erte kelipti.
« Biz 2 aptanyń ishinde 50-den astam gúldiń qazaqsha, qyrǵyzsha, oryssha, aǵylshynsha atyn bilip, kógaldandyrý álippesin qyrǵyzshaǵa aýdarýǵa árekettenip jatyrmyz. Ony elge oralǵan soń sózdikterge qarap tekserip, ǵalymdarmen aqyldasyp, tolyqtyramyz. Óıtkeni munda biz qyrǵyzsha da, oryssha da aýdarylmaǵan buǵan deıin kezdespegen birqatar gúlderdi kórdik», - deıdi Elmıra Namatova. Onyń paıymdaýynsha, qazir qorshaǵan ortany kógaldandyrý jetkilikti deńgeıde nasıhattalmaıdy. Tipti úıde de, kóshede de jáne áleýmettik mańyzy bar mektep, aýrýhana, ákimshilik úıi sııaqty nysandarda da árkim qolyna túskendi egýde. Onyń paıdasy men zııany kóp jaǵdaıda eskerilmeıdi. Sondyqtan bul ahýaldy túzetýge bilim berý uıymdary uıytqy bolýlary kerek.
