Qorshaǵan ortany qorǵaý boıynsha Konstıtýtsııanyń eki babyn ózgertý usynyldy
ASTANA. KAZINFORM − Parlament Májilisiniń depýtaty, «Aýyl» partııasy fraktsııasynyń jetekshisi Serik Egizbaev Konstıtýtsııalyq reforma komıssııasynyń úshinshi otyrysynda qorshaǵan ortany qorǵaý úshin Konstıtýtsııanyń preambýlasy men eki babyna ózgeris engizýdi usyndy.
Depýtattyń aıtýynsha, saıası reformadaǵy negizgi mindet – halyqtyń múddesin qorǵaıtyn, ýaqyt synyna tótep beretin minsiz, ádiletti zańnamalyq júıe qurý. Qarastyrylyp jatqan árbir usynys bolashaq urpaqtyń erkin de ádiletti qoǵamda ómir súrýine tikeleı áser etedi.
«Bir palataly Parlament modeline bet burý jáne saılaý júıesin tolyqtaı proportsıonaldy negizge, ıaǵnı partııalyq tizimderge kóshirý elimizdiń saıası mádenıetin jańa bıikke kóteretin demokratııalyq serpilis bolmaq. Memleket basshysynyń óz kvotalarynan bas tartyp, ókilettilikterdi Parlamentke berýi – saıası partııalarǵa artylǵan úlken senim ári zor jaýapkershilik. Osylaısha biz saıası básekelestiktiń sapaly jańa deńgeıin qalyptastyramyz», - dedi S. Egizbaev elordada Konstıtýtsııalyq sot ǵımaratynda.
Sonymen birge, Konstıtýtsııalyq komıssııa múshesi bizdiń uly muramyz − biregeı tabıǵatymyz, sýymyz ben jerimiz ekenin aıryqsha atap ótti.
Sondyqtan Konstıtýtsııanyń preambýlasyn jańa redaktsııada «Biz, Qazaqstan birtutas halqy, tabıǵatqa uqypty qaraýdyń mańyzdylyǵyn tanı otyryp, bolashaq urpaq aldyndaǵy joǵary jaýapkershiligimizdi sezine otyryp, osy Konstıtýtsııany qabyldaımyz» degen ustanymdy qoldaıtynyn jetkizdi.
«Sondaı-aq 31-bapqa azamattardyń tabıǵatty saqtaý mindetin engizip, memlekettiń qorshaǵan ortany qorǵaý maqsatyn aıqyndaýdy, al laýazymdy tulǵalardyń ekologııalyq derekterdi jasyrǵany úshin jaýapkershiligin kúsheıtýdi qajet dep sanaımyz. 61-bap boıynsha Quryltaıǵa qorshaǵan ortany qorǵaý zańdaryn retteý quziretin berý bizdiń ekologııalyq saıasatymyzǵa konstıtýtsııalyq kúsh beredi dep bilemin. Bul usynystar keler urpaq aldyndaǵy bizdiń jaýapkershiligimzdi naqty aıqyndaıdy», - dedi Serik Egizbaev.
Buǵan deıin Májilis depýtaty Elnur Beısembaev Parlamentte barlyq fraktsııa ókilderi bar saraptamalyq-quqyqtyq komıtet qurý kerektigin aıtqan edi.