Qorshaǵan ortany qorǵaý: Balalarǵa arnalǵan ǵylymı jáne praktıkalyq bilim júıesi ázirlenedi
ASTANA. KAZINFORM – Ekologııalyq jaýapty minez-qulyq qalyptastyrýǵa jáne ekologııalyq bilim deńgeıin arttyratyn keshendi sheshimder qabyldanady. Bul týraly Ekologııa jáne tabıǵı resýrstar vıtse-mınıstri Jomart Álıev aıtty.
«Qujatta tabıǵatty aıalaý, qorshaǵan ortany qorǵaý men ekologııalyq qaýipsizdikke baǵdarlanǵan balalarǵa arnalǵan ǵylymı jáne praktıkalyq bilim júıesi ázirlenedi. 2029 jylǵa deıin «Jasyl balabaqsha» baǵytyna sáıkes 622 mektepke deıingi uıym qurý, oqýshylar arasynda synyp saǵattaryn, ekologııalyq jobalar konkýrstaryn ótkizý josparda bar.
Qazirgi jetistikterdi eskere otyryp, oqytýshylardyń biliktiligi arttyrylady jáne bilim berý baǵdarlamalary jańartylady, ekologııalyq qaýipsizdikke jaýapty basshylardy, mamandardy kásibı qaıta daıarlaý jáne olardyń biliktiligin arttyrý kýrstary uıymdastyrylady. Ekologııa salasyndaǵy bilim berý baǵdarlamalary kásibı standarttarǵa sáıkes jańartylady, bul ekologııalyq mindetterdi tıimdi sheshýge qabiletti mamandardy daıarlaýǵa múmkindik beredi», – dep atap ótti vedomstvo ókili.
Spıkerdiń aıtýynsha, ýnıversıtetter aýmaǵynda kókónis, jemis-jıdek jáne jeýge arnalǵan shópterdi ósiretin «Community Gardens» qoǵamdyq baqtary ashylady, olar stýdentterge ekologııa, organıkalyq eginshilik jáne aýyl sharýashylyǵy negizderin praktıkalyq oqytý alańyna aınalady, sondaı-aq olardyń ujymdyq eńbek jáne qorshaǵan orta úshin jaýapkershilik daǵdylaryn qalyptastyrýǵa yqpal etedi.
«Joǵary oqý oryndarynda qoǵamdyq kólikti, velosıpedterdi jáne jaıaý serýendeýdi paıdalanýdy yntalandyrý boıynsha «Green Transportation Initiatives» bastamasyn engizý josparlanýda. Osy bastamalar aıasynda jol júrý qunyna jeńildikter beriledi, ekologııalyq taza kólik úshin velosıped joldary men avtoturaqtar salynady. Bul sharalar ýnıversıtet stýdentteri men qyzmetkerleriniń kómirtegi mólsherin azaıtýǵa, sondaı-aq ekologııalyq qaýipsiz qozǵalys tásilderin nasıhattaýǵa múmkindik beredi. Memlekettik qyzmetshiler úshin ekologııa jáne turaqty damý boıynsha biliktilikti arttyrý kýrstaryn engizý kózdelgen, olar memlekettik qyzmetshilerdiń ekologııa salasyndaǵy bilimin tereńdetýge jáne quzyretterin damytýǵa baǵyttalady. Osylaısha, usynylǵan sharalar men bastamalar ekologııalyq bilim berý máselelerin jan-jaqty qarastyrýǵa, halyqtyń túrli sanattary arasynda ekologııalyq aqparat alý men jaýapkershilik deńgeıin arttyrýǵa, sondaı-aq zaman talabyna saı ekologııalyq syn-qaterlerge tótep berýge qabiletti mamandardy daıarlaýǵa múmkindik beredi», - dedi vıtse-mınıstr Jomart Álıev.
Aıta keteıik, elimizde «Taza Qazaqstan» ekologııalyq mádenıetin damytý tujyrymdamasy bekitiletinin habarlaǵan edik.
Tujyrymdama aıasynda 2025-2027 jyldar aralyǵynda qaldyqtardy suryptaý jáne qaıta óńdeý jobalary iske asyrylmaq.
