Kórshi eldermen radıatsııalyq jaǵdaı jóninde derektermen almasýdyń tártibi ázirlenedi
ASTANA. KAZINFORM — Búgin Senat «TMD-ǵa qatysýshy memleketterdiń radıatsııalyq jaǵdaı monıtorınginiń derekterimen almasý kezindegi ózara is-qımyly týraly kelisimdi ratıfıkatsııalaý týraly» Zańdy maquldady.
Bul kelisimge 2023 jylǵy 8 maýsymda Sochı qalasynda qol qoıylǵan jáne radıatsııalyq jaǵdaıdy monıtorıngteý derekterin almasý, taldaý jáne boljaý arqyly ózara is-qımyldyń tıimdiligin arttyrýǵa, sondaı-aq ıadrolyq jáne radıatsııalyq qaýipsizdikti qamtamasyz etýge baǵyttalǵan.
— Kelisim TMD-ǵa qatysýshy memleketterdiń aýmaqtaryndaǵy radıatsııalyq jaǵdaıdyń jaı-kúıi jáne onyń ózgerýi týraly derekter men aqparatty usyný jáne alý jónindegi quqyqtyq qatynastardy retteıdi, — dedi depýtat Arman Óteǵulov Senattyń jalpy otyrysynda.
Aqparattyq ózara is-qımyl jáne derekter almasý aıasynda taraptardyń ýákiletti organdary mynalardy qamtamasyz etedi:
— monıtorıng derekterimen turaqty túrde almasýyn;
— beriletin aqparattyń dáıektiligin;
— qandaı da bir kútpegen jaǵdaılar týyndaǵan kezde aqparatty berý múmkin emestigi týraly ýaqytyly habarlaýdy;
— alynǵan aqparatty tek osy kelisim aıasynda paıdalanýdy.
— Árbir memleket derekter almasýǵa arnalǵan tehnıkalyq jáne baǵdarlamalyq quraldarmen paıdalanýdy óz betinshe qamtamasyz etedi, sondaı-aq olardy ruqsatsyz qol jetkizýden nemese aqparattyń taralýynan qorǵaý sharalaryn kózdeıdi. Odan bólek, derekter almasýdyń biryńǵaı tártibi ázirlenedi, ol TMD-ǵa qatysýshy memleketterdiń atom energııasyn beıbit maqsatta paıdalaný jónindegi komıssııasymen bekitiledi. Biryńǵaı tártipke radıatsııalyq jaǵdaı parametrleri týraly beriletin aqparattyń tizbesi, formattary, arhıvteý merzimderi men reglamenti, sondaı-aq kelisimge qatysýshy ýákiletti organdardyń baılanys derekteri engiziledi. Bul kelisim tek radıatsııalyq jaǵdaıdy monıtorıngteýdiń memlekettik júıesiniń derekterine ǵana qoldanylady jáne atom energııasyn paıdalaný obektileriniń radıatsııalyq monıtorıng derekterine qoldanylmaıtynyn atap ótken jón. Jalpy alǵanda, Kelisimdi iske asyrý memlekettik bıýdjetten qarjylyq shyǵyndardy talap etpeıdi jáne teris áleýmettik-ekonomıkalyq ári quqyqtyq saldarǵa ákep soqpaıdy, — dedi senator.
Eske salsaq, 2025 jylǵy 16–18 jeltoqsan aralyǵynda Tashkent qalasynda Táýelsiz Memleketter Dostastyǵyna qatysýshy memleketterdiń atom energııasyn beıbit maqsatta paıdalaný jónindegi komıssııasynyń 26-otyrysy ótti.
