Kórshi elder Qazaqstandy aınalyp ótip, Kaspıı arqyly saýda jasaýǵa ýaǵdalasty

Qyrǵyzstan, Ózbekstan jáne Reseı Kaspıı teńizi arqyly «Qyrǵyzstan – Ózbekstan – Túrikmenstan – Kaspıı teńizi – Reseı» jańa halyqaralyq mýltımodaldy kólik baǵytyn qurýǵa kelisti. Atalǵan elderdiń Kólik mınıstrlikteri baǵdardy qalyptastyrý jáne damytý týraly memorandýmǵa 2023 jylǵy 1 qarashada Shanhaı yntymaqtastyq uıymyna múshe elderdiń transporttyq forýmynda qol qoıdy, dep habarlaıdy Kazinform menshikti tilshisi.

Qyrǵyzstan Kólik jáne kommýnıkatsııa mınıstrliginiń málimetinshe, Qyrǵyzstannan júkterdi jetkizý Ózbekstan aýmaǵy arqyly Túrikmenstannyń «Túrikmenbashy» teńiz portyna avtomobıl jáne temirjol kóligimen, odan ári Kaspıı teńizi arqyly Reseı teńiz portyna deıin júzege asyrylady.

Kaspıı teńizi akvatorııasyndaǵy aýa raıy jaǵdaıyna baılanysty Qyrǵyzstannan Reseıge júkterdi jetkizý shamamen 5-10 kúnge sozylady.

Kelisimdi iske asyrý jumystary Kaspıı teńizindegi teńiz porttarynyń ınfraqurylymy daıyn bolǵannan keıin bastalady dep kútilýde.

Vedomstvodan atap ótkendeı, bul kólik baǵdarynyń keleshegi zor. Jańa dáliz – mýltımodaldy baǵyt, ony paıdalaný memorandýmǵa qol qoıǵan memleketterdiń ekonomıkasynyń damýyna serpin beredi.