«Kórshi áıelderdi soqqyǵa jyqqan»: Olımpıada chempıony Danııar Eleýsinovtyń jubaıyna aıyp taǵyldy
QARAǴANDY. KAZINFORM – Qaraǵandydaǵy kópqabatty úılerdiń birinde kórshiler arasynda janjal týyndap, qazirgi ýaqytta bul oqıǵa quqyq qorǵaý organdarynyń qaraýyna ótti. Oqıǵa ortasynda bokstan Olımpıada chempıony Danııar Eleýsinovtyń jubaıy qaldy. Kórshi áıelder ony soqqyǵa jyqty dep aıyptasa, ózi bolǵan jaǵdaıdy arandatýshylyq dep otyr.
Qaraǵandy qalasynyń Maıqudyq shaǵynaýdanyndaǵy úılerdiń birinde turatyn áıelder men qazaqstandyq tanymal boksshy, Olımpıada chempıony Danııar Eleýsinovtyń jubaıy arasynda janjal týyndaǵan. Kórshi áıelderdiń aıtýynsha, olar kórshisiniń shabýylyna ushyraǵan. Al sportshynyń jary bul jaǵdaıdy turmystyq kıkiljiń dep baǵalaıdy.
Anasy men qyzynyń sózinshe, kireberiste bastalǵan sózge kelý az ýaqyttyń ishinde tóbeleske ulasqan. Janjal barysynda kórshisi bireýin ishinen uryp, shashynan juldy dep málimdeıdi.
— Ol aldymen balaǵat sóz aıtyp, keıin meni ishimnen uryp, shashymnan juldy. Shynyn aıtqanda, janjaldyń neden bastalǵanyn ózimiz de túsinbeı qaldyq, - dedi aryzdanýshylardyń biri.
Oqıǵadan keıin eki kórshi áıel de polıtsııaǵa júginip, soqqy alǵanyn tirketken. Olardyń aıtýynsha, buǵan deıin bul otbasymen is júzinde aralaspaǵan ári eshqandaı kelispeýshilik bolmaǵan.
Al janjalǵa qatysqan áıel jaǵdaıdy basqasha túsindiredi. Onyń sózinshe, bul – egde jastaǵy týysyna qatysty aıtylǵan sózderden keıin týyndaǵan turmystyq sıpattaǵy daý.
— Bul – kádimgi turmystyq janjal. Áńgime barysynda daýys kóterilip ketti. Meniń oıymsha, bul jaǵdaı kúıeýimniń tanymaldyǵyna baılanysty ádeıi ýshyqtyrylyp otyr, - dedi ol.
Sondaı-aq áıeldiń ózi de polıtsııaǵa aryz jazǵanyn aıtyp, qazir istiń qaralýyn kútip otyr. Qaraǵandy oblystyq Polıtsııa departamentinde atalǵan oqıǵa boıynsha qylmystyq is tirkelgenin habarlady.
— Osy jyldyń 27 qańtarynda polıtsııa organdaryna kórshiler arasynda janjal bolǵany týraly habarlama tústi. Jábirlenýshiler densaýlyqqa keltirilgen zııannyń aýyrlyq dárejesin anyqtaý úshin sot-medıtsınalyq saraptamadan ótýge jiberildi. Qazirgi ýaqytta qajetti saraptamalar men tergeý áreketteri taǵaıyndalyp, istiń barlyq mán-jaıyn anyqtaýǵa baǵyttalǵan jan-jaqty tergeý júrgizilip jatyr, - dep habarlady vedomstvonyń baspasóz qyzmeti.
Saraptama qorytyndysy shyqqannan keıin is boıynsha zań talaptaryna sáıkes túpkilikti protsessýaldyq sheshim qabyldanady.
Eske salsaq, osyǵan deıin Qaraǵandyda tanymal sportshy Serik Sápıev pen onyń orynbasary arasynda da janjal týyndap, qoǵamdyq rezonansqa ulasqan edi.
