Korporatıvtik sektorda nesıelik resýrstarǵa suranys 40-dan 48 paıyzǵa deıin ósti
ALMATY. Mamyrdyń 7-si. QazAqparat /Erlik Erjanuly/ - Korporatıvtik sektorda qarjylyq emes uıymdar tarapynan nesıelik resýrstarǵa suranystyń ulǵaıýy týraly málimdegen respondentterdiń úlesi 2009 jylǵy 4-shi toqsandaǵy 30 paıyzdan 2010 jylǵy 1-shi toqsanda 48 paıyzǵa deıin ósip otyr.
Bul Ulttyq banktiń «Nesıe naryǵynyń jaǵdaıy jáne ólshemderiniń boljamy» týraly sáýir aıyndaǵy tekserýinde belgili boldy, dep habarlaıdy QazAqparat.
Bul aınalym qarajatyn qarjylandyrýǵa jáne qolda bar boryshtardy qaıta qurylymdaýǵa qajettilikke baılanysty boldy. Suranystyń ulǵaıýy sonymen qatar, memlekettiń úlesi bar iri bankter arqyly daǵdarysqa qarsy baǵdarlama sheńberinde bólinetin qarajatqa shaǵyn jáne orta bıznes tarapynan baıqalady. Bul rette daǵdarysqa qarsy baǵdarlama sheńberinde bólinetin nesıelik resýrstarǵa talaptardy bankter ózderiniń nesıelik ónimderimen salystyrǵanda neǵurlym tartymdy dep qarastyrady.
Jalpy alǵanda korporatıvtik sektor jańa «jaqsy» zaemshylardyń bolmaýymen sıpattalady, sebebi olardyń qarjylyq jaı-kúıi turaqsyz jáne basqa bankter aldyndaǵy bereshekteriniń kólemi aıtarlyqtaı úlken. Soǵan baılanysty qazirgi ýaqytta bankterdiń negizgi kúsh-jigeri olardyń defoltyna jáne nesıe qorjyny sapasynyń odan ári nasharlaýyna jol bermeý maqsatynda qazirgi klıentterimen jumys isteýge baǵyttalǵan. Qurylys, jyljymaıtyn múlikpen operatsııalar, aýyl sharýashylyǵy, sondaı-aq saýda jáne qyzmet kórsetý salalary neǵurlym táýekeldi salalar bolyp sanalady. Al ken óndirýdegi jáne óńdeý ónerkásibindegi táýekelderdiń tómendegeni baıqalady. Bul kóbinese álemdik taýar naryqtaryndaǵy baǵalardyń ósýi nátıjesindegi osy salalardaǵy jandanýǵa baılanysty. Qarjy sektoryndaǵy negizgi úrdisterdi esepke ala otyryp, bankter nesıelik naryq boıynsha 2-shi toqsanda qatań nesıe saıasatynyń saqtalýy, zaemshylar tarapynan nesıelik resýrstarǵa degen suranystyń qalypty bolýy sııaqty boljamdardy ustanady.
