Koronavırýstyń jańa túri men jańa tolqyny bolýy yqtımal – Kúnsulý Zakarıa

NUR-SULTAN. QazAqparat – Koronavırýspen kúres kezinde ǵylymdy damytýǵa baılanysty tyń serpin berildi. Bul týraly Bıologııalyq qaýipsizdik problemalary ǵylymı-zertteý ınstıtýtynyń bas dırektory Kúnsulý Zakarıa málim etti, dep habarlaıdy QazAqparat tilshisi.

«Qazmedıa» ortalyǵynda ótip jatqan «Referendým» onlaın-marafonynda ǵalymnan koronavırýs indetiniń taralýyna qatysty suraq qoıyldy.

«Іndetpen kúres boıynsha bosańsýǵa bolmaıdy. Osy kezeńde elimizdiń densaýlyq saqtaý deńgeıin aıtarlyqtaı joǵary kótere aldyq. Koronavırýs indeti bizdiń barlyq álsiz tustarymyzdy kórsetip, densaýlyq saqtaý men ǵylym júıesindegi kemshilikterdi ashyp berdi. Sondyqtan bul indetpen kúres kezinde ǵylymdy damytýǵa baılanysty tyń serpin berildi», - dedi K. Zakarıa.

Osy oraıda ǵalym elimizde koronavırýstyń taralýynyń tejeleýine ujymdyq jumystar zor yqpal etkenin atap ótti.

«Memleket basshysy bul baǵyttaǵy ǵylymnyń damýyna erekshe nazar aýdaryp, otandyq vaktsınany daıarlaýǵa der kezinde tapsyrma berdi. Atqarylǵan aýqymdy jumys nátıjesinde ujymdyq ımmýnıtet qalyptasty. Vaktsınalar aýrýdyń taralýyn tejep tur. Bul jańa ınfektsııa áli de turaqtanbaǵanyn, ıaǵnı mýtatsııaǵa ushyraı beretinin túsinýimiz kerek. Osy oraıda onyń jańa túri men indettiń taralýynyń jańa tolqyndary bolýy yqtımal. Bizdiń maqsat – osy qaterge daıyn bolý», - dedi Kúnsulý Zakarıa.

Sonymen qatar ol ǵylym salasyn qarjylyndarý júrip jatqanyn aıtty.

«Qazir kóptegen konkýrstar jarııalanyp, jas mamandarǵa erekshe mán berilip jatyr. Atap aıtqanda, bilim men ǵylym salasyna únemi nazar aýdaryp otyrý kerek», - dedi ınstıtýt basshysy.

Budan buryn habarlanǵandaı, atalǵan onlaın-marafon kezinde «aldymen ekonomıka nemese saıasat» degen taqyryp talqylanyp, sarapshylar pikir bildirgen edi.