Koronavırýstyń jańa nusqasy mamyrda órshýi múmkin - mamandar

ASTANA. QazAqparat - Koronavırýstyń «arktýr» dep atalǵan jańa nusqasy óte juqpaly jáne buryn qalyptasqan ımmýnıtetti aınalyp ótýge qabiletti. Bul týraly Reseıdiń «Rospotrebnadzor» mekemesiniń basshysy Anna Popova málimdedi, dep jazady QazAqparat reseılik TASS aqparat agenttigine silteme jasap.

«Vırýstyń bul túri aldyndaǵylarǵa qaraǵanda tez juǵady. Kez kelgen kishkentaı janasý ınfektsııa túsip, aýrýdyń damýyna yqpal etedi. Biz bul vırýsty áli de zerttep jatyrmyz, biraq sheteldik ǵalymdardyń pikirinshe, ol buryn qalyptasqan ımmýnıtetti aınalyp ótýi múmkin», - dedi Popova.

Onyń aıtýynsha, aýrý tumaý sııaqty ótedi, naýqasty aýrýhanaǵa jatqyzý qajet bolmaýy da múmkin.

Rospotrebnadzor basshysynyń aıtýynsha, onyń bólimshesi mamyr aıynyń sońynda COVID-19 nusqasy «arktýrdyń» órshý qaýpin boljap otyr.

«Densaýlyq saqtaý júıesi shamadan tys júktemelerge daıyn. Biz mamyr aıynyń sońyna qaraı aýrýdyń odan ári órshý qaýpin kórip otyrmyz. Endi demalys bastalady, barlyǵy jınalady jáne bul vırýs sonda órshýi ábden múmkin», - dedi Popova.

Onyń aıtýynsha, qazir Reseıde koronavırýstyń «arktýr» nusqasyn juqtyrýdyń tórt jaǵdaıy rastaldy.

«Omıkronnyń» jańa mýtatsııasy bolyp tabylatyn «arktýr» qazirgi kezde Úndistanda jıi kezdesedi, dep atap ótti Rospotrebnadzor basshysy.

Osyǵan deıin Ulybrıtanııada koronavırýstyń jańa shtamy anyqtalǵanyn jazdyq.