Koronavırýstyń yqtımal jańa tolqynyna daıyndyq qandaı
Atap aıtqanda, Koronavırýs ınfektsııasyn emdeýge baılanysty Tegin medıtsınalyq kómektiń kepildik berilgen kólemi (TMKKK) jáne Mindetti áleýmettik medıtsınalyq saqtandyrý (MÁMS) paketterine ózgerister engizildi. COVID -19-ǵa shaldyqqan patsıentterge jáne COVID-19 indetine kúdikti jaǵdaıda mobıldi brıgada men statsıonarlyq qyzmet úıde kórsetiledi. Bul qyzmetter saqtandyrý mártebesine qaramastan barlyq qazaqstandyqqa arnalǵan. Qazirgi epıdemıologııalyq jaǵdaıdy eskere otyryp, TMKKK paketinde «baılanysta bolǵan adamdardy, bakterııa men vırýs tasymaldaýshylardy jáne ınfektsııalyq aýrýǵa kúdikti adamdardy oqshaýlaý boıynsha» qyzmetter kózdelgen.
Onyń sózine qaraǵanda, bul ózgerister saqtandyrý mártebesine qaramastan, áleýmettik mańyzy bar aýrýǵa shaldyqqandarǵa medıtsınalyq kómekti qoljetimdi etýge múmkindik beredi. Bul ásirese kúzde ınfektsııanyń yqtımal jańa tolqyny kezinde ózekti.
«Qazir Qor tarapynan koronavırýs pen pnevmonııaǵa qarsy kúres boıynsha is-sharalardy qarjylandyrý úshin 159 mlrd teńgeden astam qarjy qarastyrylǵan. Onyń ishinde koronavırýspen aýyratyn naýqastardy emdeýge – 50,5 mlrd teńge, epıdemııaǵa qarsy sharalarǵa tartylǵan medıtsına qyzmetkerlerine ústemaqyǵa - 91,9 mlrd teńge, statsıonarlyq deńgeıdegi PTR-zertteýge – 4,2 mlrd teńge, úıdegi statsıonarda qyzmet kórsetýge – 0,4 mlrd teńge, ambýlatorııalyq deńgeıdegi PTR- ǵa - 10 mlrd teńge, mobıldi brıgadalardyń jumysyna - 2,4 mlrd teńge beriledi», - dep naqtylady basqarma tóraǵasy.
Dárigerlerge 73,7 mlrd teńge ústemaqy bólindi
Áleýmettik medıtsınalyq saqtandyrý qory epıdemııaǵa qarsy is-sharalarǵa tartylǵan medıtsına qyzmetkerleri men mamandarǵa ústemaqy tóleýdi jalǵastyrýda. Naýryz-tamyz aılarynda 73,7 mlrd teńge kóleminde ústemaqy tólendi.
Belgili bolǵandaı, tamyz aıynyń qorytyndysy boıynsha Qor COVID-19, vırýstyq pnevmonııamen kúreske tartylǵan 66 myń medıtsına qyzmetkerine 17 mlrd teńgege jýyq ústemaqy tóleıdi. QR Densaýlyq saqtaý mınıstrliginiń jańa buıryǵyna sáıkes, medıtsına qyzmetkerleriniń tizimi keńeıdi.
Munymen qosa, Bolat Tókejanov koronavırýs ınfektsııasymen jáne ortasha aýyr, aýyr jáne asa aýyr pnevmonııamen aýyryp jazylǵan qazaqstandyqtar Áleýmettik medıtsınalyq saqtandyrý qorynyń qarajaty esebinen ońaltýdan ótetinin atap ótti.
Medıtsınalyq ońaltýǵa joldama reabılıtologtyń qatysýymen aýrýhananyń nemese emhananyń mýltıdıstsıplınarlyq komandasynyń qorytyndysy boıynsha beriledi.
«Óte aýyr jáne aýyr dárejedegi KVI nemese pnevmonııamen aýyrǵan patsıentter táýlik boıy statsıonar deńgeıinde 2 kezeńdegi ońaltýǵa jatady, keıinnen 3 kezeńge aýystyrylady. Ortasha aýyr KVI/pnevmonııaǵa shaldyqqan patsıentter táýliktik statsıonar deńgeıinde, onyń ishinde sanatorıı-kýrorttyq jaǵdaıda, kúndizgi statsıonarda jáne ambýlatorııalyq-emhanalyq deńgeıde 3 kezeńdegi ońaltýǵa jatady. Sondaı-aq, úıde emdelip, medıtsınalyq uıymdarǵa júginbegen azamattarǵa 3 kezeńdi ońaltý qarastyrylǵan. Árıne, olar da mýltıdıstsıplınarlyq komandanyń tekserýinen ótýi kerek», - dedi ol.
Tókejanov qazirdiń ózinde koronavırýs ınfektsııasy men pnevmonııamen aýyratyn naýqastardy erte ońaltý aýrýhanada emdelý kezinde «Koronavırýs ınfektsııasy - COVID-19» klınıkalyq hattamasynyń 10-redaktsııasyna sáıkes júzege asyrylyp jatqanyn eske saldy.
Jalpy, ońaltý qyzmetterin kórsetý úshin bıyl Áleýmettik medıtsınalyq saqtandyrý qory 559 jetkizýshimen 46,7 mlrd teńgege shart jasasty. Olardyń qatarynda 203 jeke medıtsınalyq uıym bar.
«Densaýlyq saqtaý mınıstrliginiń buıryǵy bekitilgennen keıin, Qor koronavırýs nemese pnevmonııadan jazylyp shyqqan, medıtsınalyq ońaltýǵa muqtaj saqtandyrylǵan patsıentterdiń emin qarjylandyrýǵa daıyn», - dedi basqarma tóraǵasy.
