Koronavırýstyń tórtinshi tolqyny áli aıaqtalǵan joq- dáriger
ALMATY. QazAqparat - Koronavırýstyń tórtinshi tolqyny áli aıaqtalǵan joq. Bul týraly onlaın brıfıng barysynda S. Asfendııarov atyndaǵy QazUMÝ alǵashqy medıtsınalyq-sanıtarlyq kómek bóliminiń meńgerýshisi Dınara Mahanbetqulova málim etti, dep habarlaıdy QazAqparat tilshisi.
«Tórtinshi tolqyn áli aıaqtalǵan joq. Antıdenelerdiń joǵary tıtri bolǵan jaǵdaıda ujymdyq ımmýnıtet qalyptaspaıynsha, epıdemıologııalyq ahýal jaqsarmaıdy», - dedi Dınara Mahanbetqulova.
Spıkerdiń sózinshe, vaktsına qazirgi ýaqytta taralyp jatqan koronavırýstyń barlyq shtammdarynan qorǵanýǵa kómektesedi. Sonymen qatar, vırýsqa qarsy ári turaqty ımmýnıtet paıda bolady.
«Aýrýdan keıin qalyptasatyn tabıǵı ımmýnıtettiń kúshi adamdarda ár túrli. Tabıǵı ımmýnıtet uzaq saqtalmaýy múmkin. Vaktsınatsııa arqyly ımmýnıtettiń damýy onyń tabıǵı paıda bolýyna qaraǵanda az táýekelge ıe, óıtkeni COVID-19 juqtyrǵan kezde sımptomdardyń aýyrlyǵyn boljaý múmkin emes»,-deıdi ol.
S.D. Asfendııarova atyndaǵy QazUMÝ alǵashqy medıtsınalyq-sanıtarlyq kómek kafedrasynyń meńgerýshisi koronavırýs jaǵdaıynda bilikti medıtsınalyq kómekke der kezinde júginý óte mańyzdy ekenin aıtty.
« Koronavırýs ınfektsııasynyń belgileri týraly aıtatyn bolsaq, joǵary temperatýra, entigý, túshkirý, jótel men murynnyń bitelýi, bulshyqet pen keýde tusynyń aýyrýy, bas aýrýy men álsizdik. Jaqynda joǵaryda atalǵan belgiler júrek aınýy, qusý jáne dıareıa sııaqty belgilermen tolyqty»,- deıdi dáriger.
