Koronavırýstyń taraýyna baılanysty kólik quraldaryna qoıylatyn talaptar kúsheıtildi

NUR-SULTAN. QazAqparat – Koronavırýs ınfektsııasynyń taraýyna baılanysty Vedomstvoaralyq komıssııanyń 2022 jylǵy 1 shildedegi sheshimine sáıkes, sanıtarııalyq-profılaktıkalyq jáne sanıtarııalyq-epıdemııaǵa qarsy is-sharalardy júrgizý maqsatynda Kóliktegi Bas memlekettik sanıtarlyq dárigerdiń bıylǵy 8 shildesinen bastap kúshine enetin «Kólik obektilerinde koronavırýs ınfektsııasy boıynsha sanıtarııalyq-profılaktıkalyq jáne sanıtarııalyq-epıdemııaǵa qarsy is-sharalardy júrgizý týraly» qaýlysy qabyldandy.

Atalmysh qujatqa sáıkes turaqty jolaýshylar tasymalyn (áýe, sý, temir jol, metropolıten) júzege asyratyn uıymdar kólik quraldaryndaǵy aýa baptaý, jeldetý júıelerine tekserý júrgizýdi jáne jeldetkish súzgilerin aýystyrýdy; mamandandyrylǵan kólik quraldaryn (perrondyq avtobýstardy) qospaǵanda, kólik quralyna jolaýshylardy oryndardyń sanynan aspaıtyn mólsherde otyrǵyzý; kólik quralynyń salonyn jeldetý, dezınfektsııalaý quraldaryn qoldana otyryp, salondy ylǵaldy tazalaý jáne aýysym aıaqtalǵannan keıin qoǵamdyq kólikterge dezınfektsııa júrgizýdi qamtamasyz etý talap etiledi.

Halyqaralyq áýejaılardyń, temirjol vokzaldarynyń, teńiz jáne ózen porttarynyń basshylaryna aýa temperatýrasy men ylǵaldylyǵynyń ońtaıly jaǵdaıyn qamtamasyz etý úshin tazalaýdy, jýýdy, dezınfektsııalaýdy, jeldetý jáne aýany baptaý júıeleriniń súzgilerin aýystyrýdy qamtamasyz etý; jolaýshylardyń oryndaryn jýý jáne dezınfektsııalaý quraldaryn paıdalana otyryp, jalpy tazalaý jumystaryn júrgizý; barlyq bólmelerdi jıi jeldetý; kútý zaldarynda, ana men bala bólmelerinde, sanıtarııalyq toraptarǵa kire beriste qoldy tazartý quraldaryn ornatý; qyzmetkerler arasynda COVID-19 kezinde jeke qorǵaný quraldaryn qoldaný algorıtmi, jeke/qoǵamdyq gıgıena erejelerin saqtaý, kvarts shamdaryn paıdalaný kezinde qaýipsizdik sharalaryn saqtaý; qyzmetkerlerdiń maskalar men antıseptıkterdi mindetti túrde qoldanýy; oqshaýlaý bólmesi bar medıtsınalyq nemese saýyqtyrý pýnktiniń turaqty jumysy; keminde 60 mınýt saıyn jolaýshylardy radıohabar (daýys zoraıtqysh arqyly habarlaý) arqyly koronavırýs ınfektsııasynyń aldyn alý sharalary týraly habardar etý.

«Bul rette jolaýshylarǵa áýejaılardyń, vokzaldardyń, jolaýshylarǵa qyzmet kórsetý pýnktteriniń ǵımarattarynda, qoǵamdyq kólikte júrgende betperde kııý usynylady»,-delingen Kóliktegi sanıtarlııalyq-epıdemıologııalyq baqylaý departamentiniń baspasóz qyzmeti taratqan aqparatta.