Koronavırýstyń taralýyna qarsy sharalardy der kezinde qabyldadyq – Memleket basshysy
NUR-SULTAN. QazAqparat - Koronavırýstyń taralýyn barynsha báseńdetý úshin qajetti sharalardy der kezinde qabyldadyq. Búgin Tótenshe jaǵdaı rejımin qamtamasyz etý jónindegi memlekettik komıssııanyń kezekti otyrysynda Prezıdent Qasym-Jomart Toqaev osylaı dedi, dep habarlaıdy QazAqparat.
«Biz koronavırýstyń taralýyn barynsha báseńdetý úshin qajetti sharalardy der kezinde qabyldadyq. Men 15 naýryzda alǵashqy naýqastar belgili bolǵan sátten bastap tótenshe jaǵdaı jarııaladym. Birden eki iri qalamyzda karantın rejımi engizildi. Shyn máninde, qazir – búkil álem jurtshylyǵy úshin syn-qaterge toly ýaqyt. Osyndaı kúrdeli kezeńde Elbasymyz arnaıy maqala jarııalady. Bul – halqymyzdyń eńsesin kóteretin óte mazmundy, mańyzdy úndeý. Bereke-birliktiń arqasynda Qazaqstan bul indetti artqa tastap, zor senimmen alǵa basatyny aıqyn. Búginde biz ýaqytynda júzege asqan shuǵyl sharalardyń arqasynda indettiń keń taralýyna jol bermedik. Muny halyqaralyq qoǵamdastyq oń baǵalap otyr», - dedi Q.Toqaev.
Memleket basshysy atap ótkendeı, elimizde tótenshe jaǵdaıdyń jarııalanýyna baılanysty daǵdarysqa qarsy sharalar iske asyrylýda.
«Turǵyndarǵa jáne bızneske qoldaý kórsetý maqsatynda daǵdarysqa qarsy naqty sharalar qabyldadyq. Azamattarymyzǵa kómektesý úshin buryn-sońdy bolmaǵan kólemde qyrýar qarjy bólindi. Kóptegen memleketter halqyna osyndaı qoldaý kórsete alǵan joq. Úkimet sol qarajattyń sapaly ári maqsatqa saı jumsalýyn qadaǵalaýy tıis. Tótenshe jaǵdaı kezindegi eń mańyzdy mindetterdiń biri – azyq-túlik qaýipsizdigin qamtamasyz etý. Sondyqtan áleýmettik mańyzy bar azyq-túliktiń shekti baǵasy belgilendi. Qazir kóktemgi egis naýqany bastaldy. Bul – óte mańyzdy jumys. Sondyqtan, Úkimet jáne ákimdikter osy jumysty erekshe nazarda ustaýy qajet», - dedi Prezıdent.
Aıta keteıik, Memleket basshysy eldegi tótenshe jaǵdaı rejımin sáýir aıynyń sońyna deıin sozý qajettigin jáne úsh megapolıs pen óńirlerdegi karantındi jalǵastyrýdy tapsyrdy.
