Koronavırýstyń taralýy nege birde órship, birde baıaýlaıdy - dáriger jaýaby

ALMATY. QazAqparat - Almatydaǵy S. D. Asfendııarov atyndaǵy QazUMÝ medıtsınalyq-sanıtarlyq alǵashqy kómek bóliminiń meńgerýshisi, PhD fılosofııa doktory Dınara Mahanbetqulova onlaın brıfıng barysynda vırýstyń taralýy nelikten birde tómendep, birde ósip ketetinin túsindirdi, dep habarlaıdy QazAqparat tilshisi.

Onyń aıtýynsha, shekteý sharalaryn saqtaǵan kezde aýrý juqtyrý kórsetkishi aıtarlyqtaı tómendeıdi.

«Áleýmettik araqashyqtyqty saqtaý, maska taǵý, lokdaýn jarııalaǵanda vırýstyń taralýy tómendegenin kórdik. Keıin karantın talaptaryn jeńildetkende vırýstyń taralýy qaıta órshı túsedi. Áleýmettik qashyqtyqty saqtaǵan saıyn naýqastar sany azaıady. Tamyz aıynan bastap vırýs juqtyrýshylar sany tómendedi, bul vaktsına alýshylar sanynyń artýymen baılanysty», - deıdi ol.

Sonymen qatar ol aýrýhanaǵa aýyr halde túsetin naýqastar sany nelikten artqanyn aıtty.

«Koronavırýs aýrýynyń belgileri byltyrdan beri birqalypty ótýde. Soǵan baılanysty naýqastar úıde óz betinshe emdele bastady. Onyń arty adam densaýlyǵynyń nasharlaýyna ákep jatyr. Óz betinshe emdelgen durys emes, qandaıda bir aýrý belgisi bilinse ýaqyt ozdyrmaı dárigerge qaralý kerek. Koronavırýstyń belgisi ol túshkirý, muryn bitelýi, jótel, dene qyzýynyń kóterilýi, býyndardyń syrqyraýy jáne taǵy basqalary. Bul belgiler JRVI men tumaýǵa da tán. Olardy ajyratý úshin birinshi kezekte dárigerge habarlasý qajet. Tájirıbe kórsetkendeı qazir bul aýrý belgilerine ishek ınfektsııasy qosyldy»,- deıdi Dınara Mahanbetqulova.

Spıker ımmýnıteti tómen adamdar koronavırýsty juqtyrýǵa beıim keletinin tilge tıek etti.

«Immýnıteti tómen jáne sozylmaly aýrýy bar adamdar jıi aýyrady. Ol eresek nemese orta býyn ókilderi bolýy múmkin, eger adamnyń ımmýnıteti tómen bolsa, ol jerde jas ereksheligi mańyzdy emes. Óıtkeni qazir balalar da aýyryp jatyr», - dedi ol.