Koronavırýstyń sımptomsyz túrine shaldyqqandar em alýy kerek pe
NUR-SULTAN. QazAqparat - Koronavırýstyń sımptomsyz túrine shaldyqqandar em alýy kerek pe? Bul suraqqa «Ulttyq ǵylymı kardıohırýrgııa ortalyǵy» AQ basqarmasy tóraǵasynyń birinshi orynbasary Mahabbat Bekbosynova jaýap berdi, dep habarlaıdy QazAqparat tilshisi.
«Qandaı da bir skrınıng kezinde nemese jaqyn baılanysta bolǵan adamda osy vırýs anyqtaldy delik. Al sol ýaqytta densaýlyǵynda eshqandaı problema bolmaǵan adamdy emdeý qajet pe? Eger men ózimdi jaqsy sezinsem ári eshqandaı problema bolmasa she? Menińshe, dárini naqty belgileri boıynsha ǵana qabyldaý kerek. Aýrýdyń jeńil túri kezinde ystyq túsiretin dári ishken jón. Dene qyzýy kóterilgende tek qana paratsetomol ishýge keńes beriledi. Eger adamda ókpe qabynýy bolsa, onda bul sımptomsyz túri emes. Bul klınıkalyq túri jáne dárini dáriger belgileıdi», - dedi ol.
Onyń atap ótýinshe, ókpe qabynýy asqynyp ketken sımptomsyz patsıentterdiń shamamen 3 paıyzy statsıonarǵa jatqyzylady. Jalpy, ókpe qabynýy 7 kúnniń ishinde belgili bolady. Al odan keıin dene qyzýy kóterilip, jótel paıda bola bastaıdy.
«Ár adamda ártúrli bolýy múmkin. 7 kúnnen keıin de ókpe qabynýy belgileri paıda bolyp jatady. Ókpe qabynýy belgileri baıqalǵan kezde mindette túrde mıkrotrombylardyń qalyptasýyn baqylaıtyn bakterııaǵa qarsy terapııaǵa qosylý qajet. Menińshe, bul óte durys ádis. Óıtkeni, ókpe qabynýynyń alǵashqy satysyndaǵy patsıent baqylaýǵa alynyp, emdele bastaıdy», - dedi Mahabbat Bekbosynova.
