Koronavırýstyń sımptomsyz túrin juqtyrǵandar telemedıtsına arqyly em alady
NUR-SULTAN. QazAqparat -Elordada koronavırýstyń sımptomsyz tasymaldaýshylary telemedıtsına arqyly em alady. Bul týraly Nur-Sultan qalasynyń ákimi Altaı Kólginov paraqshasynda jazdy, dep habarlaıdy QazAqparat.
«Epıdemıologııalyq jaǵdaı men ótinish bildirýshiler sanynyń artýyn eskere otyryp, koronavırýstyń taralýyna qarsy is-qımyl jónindegi qalalyq shuǵyl áreket etý shtabynda birqatar máseleler qaraldy. Birinshi. Covid-19 ınfektsııasyn juqtyrǵandar úshin qosymsha 400 provızorlyq oryn ashyldy. Onyń ishinde, statsıonarlar bazasynda ınfarkt, ınsýlt, qant dıabeti bar (KVI-ǵa kúdigi bar) adamdarǵa arnalǵan jeke oryndar anyqtaldy. Buǵan deıin pnevmonııa men ORVI bar emdelýshiler úshin jeke korpýstar ashylǵan bolatyn. Olardy koronavırýsqa qosymsha tekseredi. Bul ınfektsııany erterek anyqtaýǵa múmkindik berdi», - dedi Altaı Kólginov.
Ekinshiden, onyń aıtýynsha, qalalyq jáne jeke menshik emhanalardyń bas dárigerlerimen, statsıonarlardyń, taldaý-ortalyqtarynyń basshylarymen jáne qalanyń bas sanıtarlyq dárigerimen onlaın-kezdesýden keıin koronavırýstyń sımptomsyz tasymaldaýshylaryn emdeý úshin telemedıtsınaǵa kóshý týraly sheshim qabyldandy. Medıtsına qyzmetkerleri beıneqońyraýlar jáne basqa da baılanys arnalary arqyly turǵyndardyń densaýlyq jaǵdaıyn qadaǵalaıdy, koronavırýstyń sımptomsyz tasymaldaýshylaryna barlyq máseleler boıynsha keńes beredi. Naýqastarda sımptomdar paıda bolǵan jaǵdaıda olar aýrýhanaǵa jatqyzylady.
Úshinshiden, shetelden ushyp kelgen áýejolaýshylardy oqshaýlaý tájirıbesi jalǵasady. «Ramada Plaza» qonaq úıinde medstatsıonarǵa jabdyqtalǵan nómirler daıyndaldy. 22 naýryzdan bastap qalaǵa kirý jáne shyǵý jabyldy, qalalyq shtab barlyq áýejolaýshylaryn tekserý týraly sheshim qabyldady. Bul qalaǵa ınfektsııa juqtyrǵandardy jibermeýge múmkindik berdi.
«Tórtinshiden uıymdar qyzmetkerlerdi qashyqtan jumys jasaý rejımine barynsha kóshirýi qajet. Qyzmeti ruqsat etilgen uıymdar sanıtarlyq-epıdemıologııalyq normalardyń qatań saqtalýyn baqylaýy kerek. Covid-19 juqtyrǵandardyń jartysy ártúrli ujymdar. Kún saıyn ákimdiktiń mobıldi toby polıtsııa qyzmetkerlerimen, sanıtarlyq dárigerlermen, volonterlermen birlesip reıdter júrgizip jatyr. Tártipbuzýshylyq bolǵan jaǵdaıda nysandar jabylady. Besinshiden, qala turǵyndary sanıtarlyq normalardy qatań saqtaýy qajet. Maska kıip (ásirese adamdar kóp jınalatyn jerlerde), múmkindiginshe adam kóp jınalatyn oryndarǵa barmaı, antıseptık paıdalanyp, ara qashyqtyq saqtaǵan jón», - dedi qala basshysy.
