Koronavırýstyń órshýi: Almatyda sanıtarlyq sharalar kúsheıtildi

ALMATY. QazAqparat – Almaty ákiminiń orynbasary Erjan Babaqumarov qalalyq Sanıtarlyq-epıdemıologııalyq baqylaý departamentiniń basshysy-bas memlekettik sanıtarlyq dáriger Jandarbek Bekshınniń, qalalyq basqarmalar men aýdandyq ákimdikter basshylarynyń qatysýymen onlaın formatta jumys keńesin ótkizdi, dep habarlaıdy QazAqparat tilshisi.

Basty mindet – Almaty qalasynda koronavırýs ınfektsııasynyń jappaı taralýyn boldyrmaý.

«Epıdemıologııalyq jaǵdaı ýshyǵa túsýde. 2020 jyldyń jeltoqsan aıynan bastap ınfektsııanyń on kúndikter boıynsha juqtyrý dınamıkasy ulǵaıýda, COVID-19 juqtyrý ortasha 1,2-1,5 esege ósti. 1-10 qańtardaǵy ósim – 1,3 ese, al 11-21 qańtardaǵy ósim – 1,1 ese. Infektsııa negizinen qoǵamdyq oryndarda, qoǵamdyq kólikterde, oıyn-saýyq oryndarynda juǵýda. Sondyqtan meıramhanalardyń jáne basqa da qoǵamdyq oryndardyń jumys rejımin erekshe baqylaýǵa alý kerek», – dep atap ótti E. Babaqumarov.

Ol onlaın keńeske qatysqandarǵa naqtyly tapsyrmalar berdi jáne alǵa qoıǵan mindetterdi oryndaýda olardyń jeke jaýapkershilikteri qaralatynyn eskertti.

Erjan Babaqumarov aýdan ákimdikterine tıisti basqarmalarmen birlesip monıtorıngilik toptardyń jumysyn kúsheıtýdi júktedi. Atap aıtqanda, ınfektsııa juǵýy múmkin táýekel ári tekseriletin nysandar tizimin ulǵaıtý tapsyryldy. Mundaı oryndar – áýejaılar, vokzaldar, iri qoǵamdyq ortalyqtar, jumys oryndary, qoǵamdyq kólik jáne taǵy da basqa.

Sonymen birge, ınfektsııa juqtyrý offlaın rejımindei jumys isteıtinder arasynda jıi kezdesýde - 30,8% (439 adam). Kásipkerlik sýbektileri qyzmetkerlerdiń qaýipsizdigin qamtamasyz etý úshin barlyq epıdemıologııalyq talapty qatań saqtaýy tıis. «Atameken» qalalyq kásipkerler palatasy men Kásipodaqtar federatsııasy birlesip tıisti túsindirý jumystaryn júrgizetin bolady.

Sońǵy 2 aptada KVI-diń 1426 jaǵdaıy tirkelse, sonyń shamamen 65% - kóppáterli úılerdiń turǵyndary. Bul, kóppáterli úılerdiń kireberisinde, lıftide jáne úı janyndaǵy dúkender men dárihanalarda indetti juqtyrý qaýpi joǵary ekenin kórsetedi. Osyǵan baılanysty, páter ıeleri kooperatıvteri (PIK) jáne qalanyń múlik ıeleri birlestigimen (MIB) júıeli negizde esikterdi, tutqalardy, lıftilerdi jáne basqa da jappaı paıdalaný oryndaryn dezınfektsııalaý men óńdeýdi kúsheıtý boıynsha jumys júrgizý tapsyryldy.

Sondaı-aq, aýladaǵy dúkender men dárihanalarda sanıtarlyq-epıdemıologııalyq talaptardyń saqtalýy erekshe baqylaýǵa alynady.

Almaty qalasynyń Qoǵamdyq densaýlyq saqtaý basqarmasyna aýrý deńgeıi ártúrli patsıentterdi aýrýhanaǵa jatqyzý men baǵyttaýdy úılestirýdi, jedel medıtsınalyq kómek jumysynyń algorıtmin jáne Almaty qalasynda juqtyrý deńgeıi ósken jaǵdaıda aýrýhanaǵa jatqyzýdy erekshe baqylaýda ustaý tapsyryldy.