Koronavırýstyń «omıkron» shtamyn úıde emdeýge bolady – dáriger

ALMATY. QazAqparat - Koronavırýstyń «omıkron» shtamyn úı jaǵadaıynda qalaı emdeýge bolady? Bul saýalǵa Almatydaǵy №11 qalalyq emhananyń jalpy dárigerlik tájirıbe bóliminiń meńgerýshisi Nazym Kúshikbaeva jaýap berdi, dep habarlaıdy QazAqparat tilshisi.

Dárigerdiń aıtýynsha, «omıkronnyń» basty belgileriniń biri – joǵarǵy tynys joldarynyń zaqymdanýy, basqa da klınıkalyq belgileri – dene qyzýynyń kóterilýi, bas aýrýy, álsizdik, bulshyqetterdiń aýrýy, tamaq aýrýy jáne jótel.

«Omıkron» shtamynyń belgileri aldyńǵy shtamdarǵa uqsamaıdy. Ony juqtyrǵan adamdar úıde emdeleýi kerek. Nelikten úı jaǵdaıynda emdelgen durys? Óıtkeni, biz bul vırýspen eki jylǵa jýyq kúresip kelemiz. Bul múldem jańa túri emes, sondyqtan ınfektsııany juqtyrǵan adam eń aldymen oqshaýlanýy kerek.

Eger qannyń ottegimen qanyqtyǵy tómendep ketse (satýratsııa), uzaq ýaqyt dene qyzýy túspese, onda aýrýhanada jatyp emdelgen abzal. Mundaı naýqastar dárigerlerdiń baqylaýynda bolýy kerek»,- deıdi ol.

Spıkerdiń sózinshe, koronavırýstyń kez kelgen shtamyn úı jaǵdaıynda emdeýge bolady, aýrýhanaǵa asqynǵan nemese sozylmaly aýrýy bar naýqastar jatqyzylady.

«Omıkron» shtamyn emdeý ádisi tumaýmen birdeı: kóp mólsherde sý ishý kerek. Bul organızmdegi ıntoksıkatsııany toqtatady. Sonymen qatar, steroıdty emes qabynýǵa qarsy preparattardy qabyldaǵan jón. Olar dene qyzýyn tómendetip, aýyrsynýdy basady. Sebebi bas aýrýy, bulshyqetterdiń aýrýy jıi kezdesedi. Eger sozylmaly aýrýlarǵa qarsy preparattar bolsa, olardy ishýdi mindetti túrde jalǵastyrý kerek. Pandemııa bastalǵan kezde, mobıldi toptar úıge kelip naýqas qanynyń ottegimen qanyqtyǵyn ólsheıtin. Endi bul ımpýlstik oksımetr termometr sııaqty, ár úıde bolýy kerek jáne únemi ólshep otyrý qajet. Óıtkeni qanyǵý ındeksiniń tómendigi aýrýdyń aýyr túrde ótip jatqanyn bildirýi múmkin», - dep túsindirdi dáriger.

Sonymen qatar, ol «omıkron» juqtyrǵan adamda dene qyzýynyń kóterilýi 2-3 kún saqtalatynyn atap ótti.

«Bul – qalypty jaǵdaı. Temperatýra kóteriledi jáne tómendeıdi, eger dene qyzýy 39 gradýstan asyp ketse jáne bes kúnge sozylsa, onda bul syrqattyń aýyrlyǵyn kórsetedi. Bul qosymsha zertteýdi qajet etedi», - deıdi Nazym Kúshikbaeva.

Sondaı- aq ol antıbıotıkterdi dárigerdiń taǵaıyndaýynsyz qoldanýǵa bolmaıtynyn basa aıtty.