Koronavırýstyń «omıkron» shtamyn balalar qalaı eńseredi

ALMATY. QazAqparat - Almaty qalalyq qoǵamdyq densaýlyq saqtaý basqarmasynyń basshysy Narıman Tabynbaev koronavırýstyń «omıkron» shtamy balalarǵa qalaı áser etetini týraly aıtty, dep habarlaıdy QazAqparat tilshisi.

«Ókinishke oraı, balalarda omıkron shtamyn juqtyryp jatyr. Statıstıkalyq málimetterge súıensek, jyl basynan beri 1000-ǵa jýyq bala emdeldi, 32 bala jansaqtaý bóliminde jatty. Abroı bolǵanda ólim bolǵan joq. Búgingi kúni ınfektsııalyq aýrýhanada 10 bala jatyr, reanımatsııada naýqas bala joq», - deıdi ol.

Onyń aıtýynsha, omıkron juqtyrǵan balalarda kataraldy qubylystar baıqalady: túshkirý, jótelý, murynnan sý aǵý, dene qyzýynyń kóterilýi, ıis pen dámniń joǵalýy.

Al jótel pnevmonııaǵa ákelýi múmkin.

«Sondyqtan biz oǵan nemquraı qaraı almaımyz. Balalardaǵy aýrý jeńil ótedi dep aıta almaımyz. Biz jeńil nemese ortasha aýyrlyqtaǵy balalardy aýrýhanaǵa jatqyzýǵa tyrysamyz. Olar tolyq jazylǵanan keıin ǵana úıine shyǵady. Búgingi tańda balalar arasyndaǵy omıkron shtammyna qatysty jaǵdaı baqylaýda. Qalada jańadan anyqtalǵan jaǵdaılardyń azaıý úrdisi baıqalady», - dedi spıker.

Buǵan deıin Narıman Tabynbaev Almatynyń ınfektsııalyq statsıonarlarynda koronavırýspen aýyratyndar sany birneshe ese azaıǵany týraly aıtqan bolatyn.