Koronavırýstyń kúzdegi jańa tolqyny: Daıyndyq qandaı
«QR Densaýlyq saqtaý mınıstrliginiń resmı ókili retinde apta saıyn elimizdegi epıdemıologııalyq ahýal jóninde jáne halyqqa kórsetilip jatqan medıtsınalyq járdem týraly aqparat berip turatyn bolamyz. Sonymen qatar, indetke qarsy kúrestiń nátıjeleleri jaıynda baıandaımyn», - dedi Baǵdat Qojahmetov.
Osy oraıda ol mınıstrliktiń atyna kelip túsetin aryz-shaǵymdarǵa jedel jaýap berýge ázir ekendikterin atap ótti.
«Baspasóz májilisinde qoıylatyn suraqtardan bólek, meniń jeke paraqshama jiberilgen suraqtardy, áleýmettik jelide aıtylatyn saýaldardyń barlyǵyn qamtýǵa tyrysamyz», - dedi resmı ókil.
Sonymen qatar ol Qazaqstanda koronavırýsty juqtyrý ósimi toqtaǵanyn jetkizdi. El boıynsha jaǵdaı aıtarlyqtaı jaqsardy. Atqarýshy bılik ahýaldy qatań baqylaýda ustap otyr. Medıtsınalyq qaýymdastyqtyń sanıtarlyq-epıdemıologııalyq qyzmeti ózine júktelgen mindetin tolyq kólemde oryndap jatyr.
«Osylaısha, elimiz eń kúrdeli kezeńdi artta qaldyrdy desek bolady. Biraq jetken jetistikke qýanyp, bosańsýǵa bolmaıdy. Endigi mindetimiz – indetti juqtyrý men ólim-jitimdi toqtatý. Osy rette barsha qazaqstandyqtarǵa sanıtarlyq erejelerdi oryndaýǵa shaqyramyn», - dedi B. Qojahmetov.
Resmı statıstıkaǵa keletin bolsaq, bıylǵy 13 naýryzynan bastap Qazaqstanda koronavırýstyq ınfektsııamen 99 442 adam aýyrdy. Jazylyp shyqqan naýqastardyń sany 72 523 nemese 72,9 paıyz. Statsıonarlarda 4 713 adam em qabyldaýda jáne 20 937 ambýlatorlyq jaǵdaı emdelýde.
Naýqastardyń arasynda 246 adamnyń densaýlyǵy nashar, 69 adamnyń densaýlyǵy óte nashar dep baǵalandy. Jalpy 70 naýqas ókpeni jasandy jeldetý apparatynda jatyr. Sońǵy bir táýlikte COVID-19 vırýsyn 741 adam juqtyrdy.
«Dúnıejúzilik densaýlyq saqtaý uıymynyń usynysy boıynsha 1 tamyzdan bastap koronavırýstyq ınfektsııa jáne oǵan uqsas belgileri bar pnevmonııa derekterin statıstıka qataryna qostyq. Osydan keıin elimiz indettiń taralýy kórsetkishi boıynsha álemdik reıtıngte bir satyǵa ǵana kóterildi. Buǵan deıin biz 27-shi oryda bolsaq, qazir 26-shy orynǵa turaqtadyq. Biraq, bul kórsetkishke qarap jigerdi jasytýǵa bolmaıdy, biz úshin eń mańyzdysy – kúresti kúsheıtip, jaǵdaıdy odan ári jaqsartý», - dedi Baǵdat Qojahmetov.
Aıta keteıik, naýryz aıynan bastap balalardyń koronavırýs ınfektsııasyn juqtyrýdyń 2 257 jaǵdaıy tirkeldi. Onyń ishinde qazirgi kezde Qazaqstan aýrýhanalarynda 114 bala jatyr.
Vedomstvo málimetine qaraǵanda, karantınniń 5 aptasynda, osy shilde aıynyń basynan beri aýrýhanalardaǵy oryndar 60 paıyzǵa bosady. Onyń ishinde jansaqtaý saqtaý bólimindegi oryndar 58 paıyzǵa deıin bosap otyr. Jedel járdemge habarlasý aıtarlyqtaı azaıdy, KVI boıynsha 68 paıyzǵa tómendedi. Qabyldanǵan keshendi sharalardyń nátıjesinde jazylyp shyqqan naýqastardyń sany 73 paıyzǵa ósti.
Emhanada dári tegin berilmek
«Qabyldanǵan sharalardyń nátıjesinde qazir qolymyzda jan-jaqty saralanǵan málimetter bar. Bul bizge bolashaqqa jospar quryp, aldyn ala daıyndalýda múmkindik beredi. ıAǵnı, indettiń kúzde kútiletin jańa tolqynyna qarsy turý úshin materıaldy ári adamı resýrstardy tolyǵymen daıyndaýǵa jaǵdaı jasaldy», - dedi Baǵdat Qojahmetov. Ortalyq kommýnıkatsııalar qyzmetindegi baspasóz máslıhatynda.
Atap aıtqanda, provızorlyq ortalyqtarda jedel áreket etý úshin medıtsınalyq qyzmetkerlerdi daıyndaýdan bólek, dári-dármektermen tolyqtyrý boıynsha aýqymdy jumys atqarylýda. Koronavırýspen jáne KVI-ǵa uqsas belgileri bar pnevmonııamen syrqattanǵan naýqastar úshin aldyn ala bir aılyq qorǵa eseptelingen preparattar satyp alyndy. Qazirgi ýaqytta óńirlerge 8,7 mlrd teńge bolatyn 91 túrli dári-dármek jóneltildi. Bul ortasha eseppen 40 myń naýqasqa jetedi.
Onyń sózine qaraǵanda, 15 tamyzdan bastap taǵy eki aıǵa jetetin qor ázirlenedi. Statsıonardaǵy 200 myń naýqasqa jetetin dári-dármektiń 50 túri qamtylmaq.
«Sonymen qatar, ambýlatorlyq jaǵdaıda em alatyn bir mıllıon naýqasty emdeýge arnalǵan dári-dármektiń 5 túrin satyp alý úrdisi aıaqtalýda. Dál osyndaı aýqymdy sharalar alǵashqy ret qabyldanyp otyr. Syrqattanyp, vırýs juqtyrý boıynsha kúdiktenseńiz, tirkelgen emhanaǵa baryp qaralsańyz bolady. Eger vırýs juqtyrǵanyńyz anyqtalsa, burynǵydaı dárihana jaǵalap júrmeı-aq qoıyńyzdar! Barlyq emhanalarda qajetti dári-dármek bar jáne aqysyz beriledi. Atap aıtqanda, paratsetamol, ıbýprofen jáne basqa da qajetti preparattar aptanyń sońyna deıin elimizdiń barlyq emhanalaryna jetkiziledi. Dári-dármekterdi jetkizý «SQ-Farmatsııa» kompanııasy tarapynan júrgizilip jatyr», - dedi ol.