Koronavırýstyń kezekti tolqynynyń bolý-bolmaýyna ózimiz yqpal etemiz – Alekseı Tsoı
NUR-SULTAN. QazAqparat – Aldaǵy birneshe aptanyń ishinde elimizdiń aýrýhanalaryna qosymsha ókpeni jasandy jeldetý apparattary jetkiziledi. Bul týraly QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.
«Biz shamamen 5 myń ókpeni jasandy jeldetý apparatyn satyp alýdy josparlaǵan edik. Qazirgi ýaqytta jetkizilip te jatyr. Qazaqstan aýrýhanalarynda búginde 3 myńnan astam apparat ornatyldy. 1,5 myń apparatty otandyq óndirýshiler shyǵarǵan. Taıaý birneshe aptanyń ishinde barlyq apparat jetkiziletin bolady»,- dedi Alekseı Tsoı.
Onyń dereginshe, búginde elimizdiń aýrýhanalarynda koronavırýspen jáne ókpe qabynýymen shamamen 4,8 myń patsıent em alyp jatyr.
«Qazir ahýal turaqty. Kórshiles elderde, ásirese Eýropa óńirinde, TMD elderinde aýrý ósimi baıqalady. Sondyqtan biz úshin osy ahýaldy ustap qalý óte mańyzdy. Kórsetkishter jaqsy bolǵanyna qaramastan tósek-oryn qoryn ulǵaıtyp, dári-dármek satyp alyp jatyrmyz. Jeke qorǵanys quraldarymen, maskamen qamtamasyz etemiz. Biz indettiń kelesi tolqynyna daıyndalýdamyz. Árıne, biz úshin onyń bolmaǵandyǵy óte mańyzdy. Eń mańyzdy fakti – áleýmettik araqashyqtyq pen maska. Aýrdyń 30 paıyzy maska taǵýǵa jáne 40 paıyzy áleýmettik araqashyqtyqty saqtaýǵa baılanysty ekendigin birneshe márte aıttyq. Osyny ustanýǵa shaqyramyz. Іndet tolqynynyń bolýyna ne bolmaýyna biz ózimiz yqpal etemiz. Bizdiń árqaısymyz osynaý ahýalǵa yqpal ete alamyz. Qazir densaýlyq saqtaý júıesine kelesi tolqynǵa daıyndyq pen aldyn alý-túsindirý jumystary ǵana baılanysty. Al qalǵany bizdiń árqaısymyzǵa, jıi qarym-qatynasta bolýymyzǵa, maska taǵýymyzǵa baılanysty ekendigi anyq», - dedi Alekseı Tsoı.
Aıta keteıik, búgin elordadaǵy №6 qalalyq emhanada QR Densaýlyq saqtaý mınıstri Alekseı Tsoı maýsymdyq tumaýǵa qarsy ekpe saldyrǵan edi.
