Koronavırýstyń ekinshi tolqynyna daıyndyq qalaı júrip jatyr
NUR-SULTAN. QazAqparat – Qazaqstan koronavırýs ınfektsııasynyń ekinshi tolqyny úshin medıtsınalyq jabdyqtar satyp alýda. Qazir 185 medıtsınalyq uıymnyń 132-si ǵana rentgendik dıagnostıkalyq apparattarmen qamtamasyz etilgen, 2020 jyldyń qazanyna deıin olar 100% jabdyqtalady, dep habarlaıdy QazAqparat.
QR Densaýlyq saqtaý mınıstrligi jergilikti atqarýshy organdarmen birlesip, koronavırýstyq ınfektsııanyń ekinshi tolqynyna daıyndyq sharalaryn iske asyryp jatyr.
Vedomstvonyń habarlaýynsha, qazirgi ýaqytta 185 medıtsınalyq uıymnyń 132-si rentgendik dıagnostıkalyq keshendermen qamtylǵan. 2020 jyldyń qazanyna deıin halyqtyń qajettilikterin qanaǵattandyrý úshin taǵy 53 rentgen apparaty satyp alynady jáne jetkiziledi. Bul aýrýhanalar men emhanalardy qajetti jabdyqtarmen 100% qamtýǵa múmkindik beredi.
Odan bólek, bıylǵy qazan aıyna qaraı óńirlerdegi aýyldarǵa 100 jyljymaly medıtsınalyq keshen jetkiziledi. Olar rentgen apparattarymen, ÝDZ, EKG jáne gınekologııalyq tekserý qurylǵylarymen jabdyqtalady.
«Aýrýhanalardyń qajettiligin qamtamasyz etý úshin 23 890 tósek-orynǵa ottegi satyp alý jumystary júrýde. Sondaı-aq, 2 578 ókpeni jasandy jeldetý apparaty alynyp jatyr, onyń 1500-i qazaqstanda jasalǵan, 1 078-i jergilikti bıýdjet pen demeýshilik kómek esebinen alynǵan. Qazirgi ýaqytta medıtsınalyq uıymdarda 1 958 ókpeni jasandy jeldetý apparaty bar», - dep túsindirdi mınıstrlik.
Jedel jáne shuǵyl medıtsınalyq kómekpen qamtamasyz etý maqsatynda Qazaqstanda jasalǵan 1 967 sanıtarlyq kólik satyp alyndy. Taǵy 360 kólik otandyq taýar óndirýshilerden lızıng aıasynda satyp alynady.
Sonymen birge, elimizde 13 juqpaly aýrýlar aýrýhanasy salynyp jatyr, olar da 2020 jyldyń qazanyna qaraı qoldanysqa berilýi tıis. Nátıjesinde Qazaqstanda barlyq halyqaralyq standarttarǵa saı keletin 16 jańa aýrýhana jumys istemek.
