Koronavırýstyń birinshi tolqynynda halyqty psıhologııalyq turǵydan daıyndaǵan joqpyz – Erbolat Dálenov
NUR-SULTAN. QazAqparat – Koronavırýstyń birinshi tolqyny bolǵan kezde halyqty psıhologııalyq turǵydan daıyndaǵan joqpyz. Bul týraly QazAqparat tilshisine bergen suhbatynda QR Profılaktıkalyq medıtsına akademııasynyń akademıgi, medıtsına ǵylymdarynyń doktory, professor Erbolat Dálenov aıtty.
«Koronavırýstyń birinshi tolqyny bolǵan kezde biz halyqty psıhologııalyq turǵydan daıyndaǵan joqpyz. Tek ol qashan keldi dep kútýmen boldyq. Aýrýdyń aldyn alý nemese odan saýyǵý adam psıhologııasyna tikeleı baılanysty. Sondyqtan kóbimiz bul indettiń bar ekenine senbeı, toı-tomalaq uıymdastyrdyq. Qazirgi jaǵdaıda ádet-ǵurypqa salynyp, toı jasaý janashyrlyqtyń belgisi emes - ol mádenıettiń tómendigi», - dedi QR Profılaktıkalyq medıtsına akademııasynyń akademıgi Erbolat Dálenov.
Sondaı-aq akademık koronavırýstyń ekinshi tolqynyna qatysty pikir bildirdi.
«Kúz mezgilinde, ásirese balalar arasynda tumaý kóbeıedi. Al ol óz kezeginde koronavırýsqa ulasýy múmkin. Sondyqtan indettiń jańa tolqyny mektep jasyndaǵy balalar arasynda jıi taraý qaýpi bar. Sondaı-aq, vırýsty 50 jastan asqan azamattar jıi juqtyrady. Buǵan qosa, biraz ýaqyt úı karantıninde otyrǵan adamdardyń júıkesi juqardy. Osy sebepti olar dalaǵa shyqqanda, ózgelermen qarym-qatynas jasaǵanda ınfektsııany tez juqtyrýǵa beıim. Munyń aldyn alý úshin qazirgi tańda S, E, A jáne tsınk vıtamınderin qabyldaý kerek. Sebebi koronavırýs adam aǵzasyndaǵy usaq tamyrlardy zaqymdaıdy. Al bul dárýmender tamyr qabyqshasyn qataıtýǵa múmkindik beredi» , - dep atap ótti Erbolat Derbisáliuly.
