Koronavırýstyń belgileri eshqandaı qısynǵa kelmeıdi – qostanaılyq dáriger
NUR-SULTAN. QazAqparat – Saıajaılarda kóbinese egde jastaǵy adamdar turady. Olar vırýs juqtyrý men odan kóz jumýyna qaýpi joǵary top. Bul týraly Qostanaı oblysy aýmaǵyna karantın engizýge qatysty ótken onlaın brıfıngte aıtyldy, dep habarlaıdy QazAqparat tilshisi.
«Óndiristik kásiporyndar jumysshylaryn úıden jumysqa, jumystan úıge aparyp tastaı alatyn jaǵdaıda jumys isteı alady. Al saıajaı ýchaskelerine keletin bolsaq, ol jaqta kóbinese 60 jastan asqan adamdar turady. Bul – koronavırýs juqtyrý jáne odan kóz jumý qaýpi joǵary top. Jetiqaradaǵy jaǵdaı aýrý belgileri qanshalyqty jyldam paıda bolyp, onyń aldyn alý múmkin bolmaı qalatynyn kórsetti. Koronavırýstyń belgileri eshqandaı logıkaǵa kelmeıdi», - deıdi Qostanaı oblysy bas sanıtarlyq dárigeri Vladımır Nechıtaılo.
Ol oblysta aýrýdyń taralýy boıynsha monıtorıng júrgizilip otyrǵanyn aıtty.
«Biz qazir kún saıyn monıtorıng júrgizemiz, tipti jaǵdaıy qanaǵattanarlyqqa jaqyn jas adamdarǵa da monıtorıng júrgizemiz. Tájirıbemizge súıensek, 7-13 táýlik aralyǵynda aldyn ala boljanbaǵan jaǵdaılar oryn alýy múmkin, sol sebepti egde jastaǵy adamdarǵa táýekel etip, saıajaıǵa barmaýdy ótiner edim», - deıdi ol.
