Koronavırýstyń aýyr túrine shaldyqqandardyń este saqtaý qabileti tómendeıdi - Myńjylqy Berdihodjaev
«Koronavırýstyń aýyr túrine shaldyqqan naýqastarda ottegi jetispeıdi. Saldarynan ol nervtik júıelerge, onyń ishinde mıdyń jumysyna teris áser etedi. Sondyqtan dertti aýyr ótkergen adamdardyń este saqtaý jady nasharlaıdy. Bul naýqastardyń jas ereksheligine qaramaıdy. Degenmen, atalǵan patologııa koronavırýsqa shaldyqqandardyń 10%-da ǵana kezdesedi. Sondaı-aq indet dám, ıis sezý músheleriniń nervtiń júıelerin zaqymdaıdy. Odan tolyq saýyǵý úshin keminde 2 aı, al eń uzaq degende 6 aı ýaqyt kerek. Keıbir derekter boıynsha, ıis sezý múshesi dertten aıyqqan soń da múlde qalpyna kelmeýi múmkin», - dedi neırohırýrg Myńjylqy Berdihodjaev.
Sonymen qatar, neırohırýrg koronavırýspen aýyrǵan adamdardyń tolyq saýyǵýy úshin qoldanylýy tıis sharalar týraly aıtyp berdi.
«Infektsııanyń jeńil túrimen aýyrǵan azamattardyń ókpesi shamamen 6 aı kóleminde tolyq qalpyna keledi. Al aýyr túrine shaldyqqandardy emdeýge odan da kóp ýaqyt ketedi. Oǵan qosa, em-domnan keıin olardyń ókpesinde tyrtyq qalady. Sondyqtan bul kategorııadaǵy naýqastarǵa erekshe kútim qajet. Sebebi olardyń ımmýnıteti nashar, tıisinshe onyń ózge de aýrýlardy juqtyrýy qaýiptiligi joǵary. Mundaı adamdarǵa jeńil gımnastıkamen aınalysqan, qosymsha V1, V6, V12 jáne D dárýmenderin ishken óte tıimdi. Júgirý, sekirý jáne t.b. aýyr jattyǵýlar jasaýdyń qajeti joq. Olardyń ókpesi kóp kúsh túsetin qımyldarǵa áli daıyn emes. Eń paıdalysy - karaokemen án aıtý. Bul sátte ókpede vıbratsııa bolady. Ol kletkalardy tez qalypqa keltiredi jáne án aıtqan adamnyń kóńili kóteriledi», - dep atap ótti Myńjylqy Berdihodjaev.
Eske sala keteıik, ótken táýlikte el boıynsha koronavırýs ınfektsııasynyń belgileri bar pnevmonııanyń 364 jaǵdaıy tirkeldi.
