Koronavırýstyń alǵashqy belgileri baıqalǵanda birden dárigerge qaralý kerek - Alekseı Tsoı

NUR-SULTAN. QazAqparat – Turǵyndar koronavırýs ınfektsııasynyń alǵashqy belgileri baıqalǵanda medıtsınalyq kómekke júginýleri kerek. Bul týraly Úkimet otyrysynda QR Densaýlyq saqtaý mınıstri Alekseı Tsoı málim etti, dep habarlaıdy QazAqparat tilshisi.

Mınıstrdiń aıtýynsha, jalpy eldiń medıtsınalyq uıymdary turaqty jumys istep tur. Búginde 120 myńnan astam patsıent koronavırýs ınfektsııasynan emdelýde. Degenmen, alǵashqy táýlikterde reanımatsııaǵa túsken naýqastardyń basym bóligi, 40 paıyzdan astamy «delta» shtammyn juqtyrǵandar bolyp otyr. Atalǵan patsıentter óz-ózin emdeýmen aınalysqan jáne medıtsınalyq kómekke kesh júgingen.

«Osyǵan oraı jergilikti atqarýshy organdar halyq arasynda aýrýdyń aldyn alý, óz-ózin emdeýge jol bermeý jáne medıtsınalyq kómekke der ýaqytynda júginý máseleleri boıynsha aqparattyq túsindirý úshin jumystaryn kúsheıtýi qajet. Halyqtan koronavırýs ınfektsııasynyń alǵashqy belgileri baıqalǵanda medıtsınalyq kómekke júginýdi jáne óz-ózin emdeýmen aınalyspaýdy ótinemin. Qarapaıym erejelerdi saqtaý júzdegen adamnyń ómirin qutqaratyndyǵyn este saqtaý qajet»,- dedi Alekseı Tsoı.