Koronavırýstyń 80 paıyzy jeńil formada ótedi - maman pikiri

NUR-SULTAN. QazAqparat - Medıtsınalyq maska - koronavırýsten qorǵanýdyń basty quraly emes. Bul týraly QR juqpaly aýrýlar boıynsha jetekshi mamany Dınagúl Baesheva aıtyp berdi, dep habarlaıdy QazAqparat tilshisi.

«Koronavırýs bizdiń elimizge kelgen joq, el aýmaǵynda tirkelgen joq. Biraq onyń óz qaǵıdalary bar jáne munda medıtsınalyq maska basty qural emes. Munda biz aıtqan profılaktıkalyq sharalardy oryndap, túshkirý mádenıetin saqtaý qajet. Máselen, aýrý adam túshkirip, tutqany ustaıdy. Іzinshe saý adam kelip, sol tutqany ustaıdy. Ári qaraı kózin, aýzyn ustasa, aýrý juǵady. Sondyqtan, basty nazardy maskaǵa aýdarmaı, jeke gıgıena talaptaryn saqtaý qajet. Basty profılaktıkalyq qural - maska emes, jeke gıgıena», - dedi spıker Ortalyq kommýnıkatsııalar qyzmetinde ótken baspasóz qyzmetinde.

Onyń aıtýynsha, koronavırýs aýrýynyń 80 paıyzy jeńil formada ótedi.

«Koronavırýs aýrýynyń 80 paıyzy jeńil formada ótedi. Sondyqtan, dúrlikpe týdyryp, ýaıymǵa salynýǵa bolmaıdy. Áıtse de, aldyn alý sharalaryn umytpaǵanymyz jón. Aýrýdy jeńýdiń, vırýsty taratpaýdyń 50 paıyzy siz ben bizdiń áreketimizge baılanysty. Qoǵamdyq oryndarǵa jıi barmańyz, aýrý tirkeldergen memleketterge barýdan bas tartyńyz», - dedi D. Baesheva.

Buǵan deıin dərilik zattar men medıtsınalyq buıymdardy saraptaý ulttyq ortalyǵynyń» bas Dırektory Arnur Nurtaev elimizdegi medıtsınalyq maska jetispeýshiligi máselesin túsindirgen edi.

Aıta keteıik, qazirgi ýaqytta álemde COVID-19 vırýsyn juqtyrǵandar sany 90 893 adam jáne odan 3110 adam qaıtys boldy.

Sońǵy 48 saǵatta Qytaıdan tysqary jerde tirkelgen 1848 naýqastyń 80%-y úsh elge tıesili: Iran, Italııa jáne Ońtústik Koreıa.