Koronavırýstyń 5G sıgnaly arqyly taralatyny týraly vıdeo – feık
NUR-SULTAN. QazAqparat – Áleýmettik jelilerde koronavırýs ınfektsııasynyń 5G sıgnaly arqyly taralatynyna qatysty vıdeo paıda boldy, dep habarlaıdy QazAqparat.
Vıdeoda arnaıy jumys kıimin kıgen er adam 5G sıgnalyn taratatyn baǵanaǵa arnalǵan montajdaý taqtasyn kórsetedi. Qurylǵyda COV-19 jazýy kórinedi. Rolık avtorynyń pikirinshe, bul koronavırýs ınfektsııasynyń 5G sıgnaldary arqyly taralatyndyǵy týraly teorııany dáleldeıdi-mys.
stopfake.kz saıtynyń jazýynsha, taqtadan óndirýshiniń derekteri sııaqty basqa da jazýlardy kórýge bolady. Olarǵa sáıkes, qurylǵy Taıvannyń Hannstar fabrıkasynda jasalǵan. Kompanııa teledıdar jabdyqtary men dıspleılerdi shyǵarýmen aınalysady. Ol telefonııamen nemese ınternet-jabdyqpen baılanysty eshteńe shyǵarmaıdy.
Sondaı-aq, vıdeoda avtor kórsetken bólshektiń SCART konnektory bar ekenin baıqaımyz. Ol teledıdar men basqa vıdeo qurylǵyǵa, mysaly, beınemagnıtofonǵa nemese DVD oınatqyshqa qosylý úshin paıdalanylady. Qazir konnektorlardyń bul túrleri eski bolyp sanalady. Olardyń ornyna HDMI porttary keńinen qoldanylady.
– Bul COV-19 tańbalary jazylǵan eshqandaı komponentteri bomlaǵan óte eski teledıdardyń tirkemesinen alynǵan. Onyń mobıldi ınternet-jelilerge, sondaı-aq 5G qoldanýǵa esh qatysy joq, – dep habarlady Virgin Media kompanııasynyń ókili Saımon Dornan óziniń Associated Press-ke jazǵan hatynda .
Rolık avtorynyń 5G jelileriniń qaýiptiligi týraly basqa málimdemelerine de esh negiz joq. Jalpy, ınnovatsııalyq ádistiń jumys isteý prıntsıpi 3G jáne 4G jelileriniń qazirgi jumysynan erekshelenbeıdi. Bir ǵana aıyrmashylyǵy – jańa format joǵary ótkizý qabilettiligin qamtamasyz etedi. Birinshi Pre-5G bazalyq stantsııasy 2015 jyly Barselonada iske qosyldy. 2016 jyly bul tehnologııa Reseıde alǵash ret synaldy. Ol kezde málimetterdi taratý jyldamdyǵy 4,5 Gbıt/sek bolǵan. Aıta keteıik, sıgnaldyń áreket etý radıýsynda qustardyń, janýarlardyń nemese jándikterdiń jappaı qyrylý faktileri tirkelgen joq. Sondaı-aq, adamdardan tynys alý, bas aýrýy jáne basqa da aýrýlar týraly shaǵymdar bolmaǵan joq.
5G jelileri men COVID-19 baılanysy DDSU saıtynda joqqa shyǵarylǵan bolatyn.
– Vırýstar radıosıgnaldarmen nemese uıaly baılanys tolqyndarymen taralmaıdy. COVID-19 indeti 5G jelileri tartylmaǵan kóptegen elderde taralýda, delingen uıymnyń resmı ınternet-portalynda.
Bul pandemııa men 5G sıgnaldarynyń baılanysyn «áshkereleıtin» mıfterdiń biri ǵana. Buǵan deıin StopFake.kz osy tehnologııanyń kómegimen «Aqyl-oıdy baqylaý» týraly habarlamamen feık taratylym týraly jazǵan bolatyn.
