Koronavırýstyq ınfektsııaǵa qarsy vaktsına joq – Bekshın

NUR-SULTAN. QazAqparat – Qytaıda tarap jatqan koronavırýstyq ınfektsııaǵa qarsy vaktsına joq. Bul týraly búgin Ortalyq kommýnıkatsııalar ortalyǵynda ótken brıfıngte QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary Jandarbek Bekshın málim etti, dep habarlaıdy QazAqparat tilshisi.

«Eger Qazaqstanda koronavırýstyq ınfektsııamen aýyryp qalǵan jaǵdaı tirkelse,eń aldymen, naýqasty oqshaýlaý qajet. Koronavırýsqa qarsy arnaıy dári-dármek joq, vaktsına da ázirlengen joq. Vaktsına ázirleý úshin kóp ýaqyt, tipti bir jylǵa jýyq merzim ketedi. Odan keıin ony óndirýshige berý kerek, sodan soń taratý qajet. Bul ońaı másele emes», - deıdi Jandarbek Bekshın.

Ol mundaı dertke shaldyqqan adamǵa sımptomdaryna qaraı em júrgiziletinin aıtty.

«Jótel, álsizdik, dene qyzýy kóterilý jaǵdaıy bolsa dereý dárigerge qaralý kerek. Jalpy, bul dertten kóz jumǵandardyń ortasha jasy 65 jastan asqandar. Olardyń ımmýnıteti tómen, sáıkesinshe ólimmen aıaqtalady. Sol sebepti asqynbaı turyp medıtsınalyq kómekke júginý kerek», - dedi ol.