Koronavırýsty sımptomsyz ótkeretin adamdardy oqshaýlaý merzimi 10 kúnge qysqartyldy
«Bizdiń nazarymyzdy aýdartqany: kóptegen elde koronavırýs ınfektsııasyn anyqtaý ádistemesi – medıtsınalyq uıymdarǵa JRVI-diń jótel nemese dene qyzýy sekildi belgilerimen kelgen patsıentterdiń ishinen anyqtaýǵa negizdelgen. Sol naýqaspen jaqyn qarym-qatynasta bolǵan adamdar da zertteledi. Osylaısha naýqastar tirkeledi. Al biz Qazaqstanda epıdemııanyń sharyqtaý sheginde, ıaǵnı sáýir aıynyń ekinshi jartysynda jabyq ujymdarda belsendi testileý baǵdarlamasyn bastadyq. Infektsııanyń jasyryn oshaqtaryn tabý úshin saý adamdardyń ózi de testten óte bastady», - deıdi Eljan Birtanov Densaýlyq saqtaý mınıstrliginiń Facebook paraqshasynda «Habar 24» arnasy tilshisiniń suraǵyna jaýap bere otyryp.
Eljan Birtanov jumysy toqtamaǵan uıymdar men kásiporyn ujymdarynyń ishinde jasyryn oshaqtardyń bolýy múmkin ekenine boljam jasalǵanyn aıtyp ótti. Aqyry boljam rastalyp, koronavırýs ınfektsııasyn aýrý belgisi joq kúıde kóteretin adamdardyń kóp ekeni anyqtalǵan.
«Bizdiń eldegi ósim – koronavırýs ınfektsııasyn sımptomsyz kóteretin adamdardyń tirkelýimen tikeleı baılanysty. Qazirgi tańda biz kúnine tegin 25 myńnan astam adamdy testten ótkizemiz. Kúnine koronavırýs ınfektsııasyn juqtyrǵan shamamen 300 adamnyń 80 paıyzy ony aýrý belgisi joq kúıde kóteretini anyqtaldy. Olar aýrýdy sezbeıdi. Álbette bul kórsetkishter taldaý jumystaryn kúsheıtýge májbúr etti. DDU-nyń standartyna sáıkes bul adamdar oqshaýlanǵan. Áý basta biz olardy ınfektsııalyq aýrýhanaǵa oqshaýlasaq, qazir bul amaldan bas tartyp, karantındik nysandarǵa jatqyza bastadyq nemese úılerinde baqylaýda ustadyq. Sol sebepti Qazaqstanda tirkelgenderdiń kóbin naýqastar men vırýsty alyp júrýshiler dep aıtýǵa bolady», - dedi ol.
Osyǵan baılanysty Qazaqstan vırýspen kúrestiń taktıkasyn ózgertken.
«Keshe ǵalymdardyń bárimen kelisip, koronavırýsty aýrý belgisi joq kúıde kóteretin adamdardy ınfektsııalyq statsıonarǵa jatqyzbaýdy jón dep sheshtik. Olarǵa ıntensıvti terapııa qajet emes. Ýchaskelik dárigerler olardy úılerinde baqylaı beredi. Eger aýrý belgileri paıda bolyp jatsa, aýrýhanaǵa jatqyzýǵa bolady. Zertteý kórsetip otyrǵandaı «belsendi» naýqastardan qaraǵanda bul adamdar asa qaýipti emes. Osyǵan baılanysty olardy oqshaýlaý merzimin 10 kúnge úıinde baqylaıtyn bolamyz. Onynshy kúni onyń úıine dárigerler kelip, test alady. Ol kezde adam jazylyp ketse, ol baqylaýdan alynady. Eger test onyń «oń» nátıjeni kórsetip tursa, biz ony ary qaraı baqylaımyz», - dedi Eljan Birtanov.