Koronavırýsty qaıta juqtyrý múmkin be – maman pikiri
Pýlmonolog koronavırýstyń sýyqqa qalaı áser etetinin túsindirdi jáne COVID-19 kelesi tolqynynyń qalaı ótetini týraly pikirin bildirdi.
«Sýyqtyń ózi koronavırýs ınfektsııasynyń taralýyna esh áser etpeıdi. Biz Reseı men Eýropada koronavırýstyń jazda jáne qysta birdeı tez taralatynyn kórip otyrmyz. Koronavırýstyń ekinshi tolqynyna kelsek, ǵalymdar koronavırýstyń taralýynyń birneshe nusqasyn modeldep kórdi. Birinshisi – jazyqtaǵy tóbeler, ıaǵnı azdap kóteriledi, sosyn jaǵdaı turaqtanady, sodan keıin qaıtadan kóteriledi. Ekinshisi – kishkentaı ózgerister bolatyn baıaý sheńber, al úshinshi nusqa – úlken daýyl, ıaǵnı jappaı juqtyrý bolady, kúrt tómendeıdi, sodan keıin aýrýdyń tómen deńgeıi qalady», - dedi K. Garkalov QazAqparat tilshisine bergen suhbatynda.
Onyń aıtýynsha, Qazaqstanda koronavırýstyń taralýynyń úshinshi nusqasy baıqaldy.
«Endi shilde aıyndaǵydaı juqtyrý sany kóp bolmaıdy dep oılaımyn. Árıne, koronavırýs ınfektsııasy eshqaıda ketpedi, áli aýyrmaǵan adamdar bar. Biraq maýsym-shilde aılarynda bolǵan ekinshi tolqyn endi bolmaıdy dep oılaımyn. Birinshi tolqynnyń tájirıbesi bar jáne densaýlyq saqtaý júıesi tyńǵylyqty daıyndaldy. Ekinshiden, qazir halyq vırýstyń qaýpin burynǵydan da jaqsy túsinedi jáne saqtaný sharalaryn jasaıdy. Úshinshiden, qazir jazda aýyrmaǵandar aýyrýy múmkin. Al kópshiligi jazda aýyryp qoıǵan edi», - deıdi pýlmonolog.
Sonymen birge, dáriger koronavırýspen qaıta aýyrý jaǵdaılaryn muqııat zerttep, dáleldeý qajettigin aıtty.
«Dúnıejúzilik densaýlyq saqtaý uıymy koronavırýsty qaıta juqtyrý jaǵdaıyn resmı rastaǵan joq. Biraq DDU janynan osy jaǵdaılardy zertteıtin ǵalymdardyń arnaıy toby quryldy. Qytaıdaǵy bir patsıentte PTR synamasy úsh aı boıy oń nátıje kórsetip keldi. Oǵan ár apta saıyn zertteý júrgizildi. Munda shyryshty qabatta qalǵan vırýs bólikteri testke reaktsııa jasady degen dálelder bar. Negizi naýqas klınıkalyq túrde jazylǵan, biraq PTR testi oń nátıje kórsete bergen. Bul óte qıyn másele, munda juqtyrýdyń shynymen qaıtalanǵanyn dáleldeý kerek. Ulybrıtanııa ǵalymdarynyń ımmýnıtet bir jylǵa, tipti keıbir adamdarda úsh jylǵa sozylýy kerek degen zertteýleri bar. Eger antıdeneler bolsa, olar jumys isteýi kerek», - deıdi maman.
Sonda da dáriger qarapaıym vırýstan qorǵaný joldaryn ustanýǵa shaqyrdy.
«Árıne, qorǵanys quraldaryn paıdalaný kerek. Maska taǵyp, áleýmettik qashyqtyqty saqtańyz, qolyńyzdy sabynmen jıi jáne muqııat jýyńyz. Jaqsy uıqy, taza aýada serýendeý, jaqsy kóńil-kúı ımmýnıtettiń kúsheıýine yqpal etedi», - dep tolyqtyrdy Konstantın Garkalov.
