Koronavırýsty qaıta juqtyrý: Densaýlyq saqtaý mınıstrligi salystyrmaly tekserý júrgizýde
Bul jaıynda QR Densaýlyq saqtaý mınıstrligi Sanıtarlyq-epıdemıologııalyq baqylaý komıtetiniń tóraǵasy Aıjan Esmaǵambetova aıtty, dep habarlaıdy QazAqparat tilshisi.
«Shynymen de búginde tipti ádebıetterdiń ózinde qaıta juqtyrý jaǵdaılarynyń oryn alýy múmkin ekendigi týraly málimetter paıda bola bastady. Bul koronavırýstyń jańa mýtatsııaǵa ushyraǵan túrleriniń aınalymǵa túsýimen baılanysty bolýy yqtımal. Qazirgi ýaqytta sımptomdy nemese sımptomsyz jaǵdaılardyń qaıtalaný sany qansha, osy aýrýlar arasyndaǵy ınterval qandaı ekendigin túsiný úshin aqparattyq júıemen salystyryp tekserý júrgizip jatyrmyz», - dedi ol Ortalyq kommýnıkatsııalar qyzmetindegi brıfıng barysynda.
Onyń atap ótýinshe, salystyryp tekserýdiń nátıjesin koronavırýstyń qaıta juqtyrý múmkindigi týraly naqty derek paıda bolady.
«Medıtsınalyq ádebıetterge sáıkes, úsh aıǵa deıin oń nátıje berýi múmkin vırýs jaryqshaqtary bolýy da yqtımal. Tiri vırýs bolmaǵanymen óte sezimtal PTR testileý vırýs tuqymnyń kishkentaı ýchaskesin anyqtaýy múmkin. Sondyqtan da salystyryp tekserý júrgizilip jatyr», - dedi komıtet tóraǵasy.