Koronavırýsty anyqtaýda PTR-testke nelikten basymdyq beriledi - mınıstr jaýaby

NUR-SULTAN. QazAqparat – QR Densaýlyq saqtaý mınıstri Alekseı Tsoı koronavırýsty anyqtaý isinde PTR-testke nege basymdy berilip otyrǵanyn túsindirdi, dep habarlaıdy QazAqparat tilshisi.

«Qazaqstanda koronavırýsty anyqtaýǵa arnalǵan ekspress-testerdiń birneshe túri tirkelgen. Keıbir kommertsııalyq kompanııalar osy testerdi paıdalanyp júr. Bul jerde másele mynada. Dúnıejúzilik densaýlyq saqtaý uıymy aýrý juqtyrǵandardyń resmı satıstıkasyn júrgizý úshin biryńǵaı tásil retinde PTR-testi qoldanady. Sondyqtan, álemde qoldanylatyn «altyn standart» PTR-test bolyp tur», - degen vedomstvo basshysy, PTR-ge balama antıgender, IFA-tester Qazaqstanda da tirkelgenin atap ótti.

«Ondaı testerdiń birneshe túri qoldanylyp jatyr. Qalasa, paıdalanýǵa bolady. Qazir keıbir PTR-test júrgizý qıyn jerlerde osyndaı ekspress-testerdi eldiń ishinde de qoldaný máselesi pysyqtalyp jatyr. Ol testerdi óndirýshiler sapasy men tıimdiligi 90 paıyzdan kem emes dep kórsetedi. Biraq qalaı bolǵanda da koronavırýs ınfektsııasynyń aqtyq dıagnozy PTR-test qorytyndysynan keıin ǵana moıyndalady», - degen mınıstr, eksperss-testi árkim óz betimen paıdalana almaıtynyn eskertti.

«Bul testerdi qoldanyp júrgen uıymdar erkin satyp otyr. Biraq ony árkim óz betimen paıdalana alady degen sóz emes. Ol testerdi alýdyń belgili bir protsedýrasy bar. Keıbiri qan tamshysyn qoldansa, keıbiri muryn shyryshyn alady. ıAǵnı, mamandar ǵana isteýi tıis ádisteri bar. Bul test qorytyndysynyń sapasy búlinbeý úshin kerek», - dedi Alekseı Tsoı.