Koronavırýsty anyqtaý úshin 14 kúndik karantın jetkilikti me – mınıstr jaýaby
«Karantın merzimine qatysty túrli oı-pikirler bola beredi. Biraq biz Dúnıejúzilik densaýlyq saqtaý uıymynyń tikeleı keńesimen osyndaı sheshim qabyldap jatyrmyz. Jalpy basqa da mınıstrliktermen tikeleı baılanystamyz. Búkil dúnıe júzinde karantın merzimi 14 kúndik tártippen júrgiziledi. 14 kúnnen keıin taǵy 10 kún telefon arqyly baqylaýda ustaımyz. Sebebi árbir adamnyń genetıkasy ártúrli», - dedi Eljan Birtanov «Habar 24» arnasyna bergen suhbatynda.
Aıta ketsek buǵan deıin Densaýlyq saqtaý mınıstri elimizde koronavırýs ınfektsııasynyń aldyn alý jumystary qalaı júrgizilip jatqanyn aıtyp bergen edi. Onyń aıtýynsha jalpy dúnıe júzi vırýstyń jańa túri boıynsha qıyn jaǵdaıda. Árbir memleket óziniń zańy boıynsha azamattaryn qorǵaýda.
«Bizdiń de negizgi maqsatymyz – halyqtyń densaýlyǵy. Eshqandaı qaýip joq. Tek karantın. Osy ýaqytqa deıin Ýhannan 300-ge tarta óz azamattarymyzdy, basqa sheteldik azamattardy ákelip, karantınnen ótkizdik. Eshqandaı koronavırýs tabylǵan joq. Bári úılerine tarap ketti. Qazir de Qytaıdan keletin azamattarǵa karantın engiziletin bolady. 20 aqpannan bastap 160 adam karantınde jatyr. Olardyń ishinde otandastarymyzben birge QHR-dyń da, basqa eldiń de azamattary bar», - dedi ol.