Koronavırýstan jazylǵandar vaktsına alýy kerek pe

NUR-SULTAN. QazAqparat – Koronavırýstan aýyryp, jazylyp turǵandar da vaktsına alýy kerek pe? Bul saýalǵa búgin QR DSM Qoǵamdyq densaýlyq saqtaý mınıstrliginiń Qoǵamdyq densaýlyqty saqtaý ulttyq ortalyǵy dırektorynyń orynbasary Aınagúl Qýatbaeva jaýap berdi, dep habarlaıdy QazAqparat tilshisi.

«Juqpadan keıin aǵzada qalyptasatyn ımmýnıtet turaqsyz jáne az ýaqytqa ǵana jetkilikti ekendigin otandyq, sonymen qatar álem elderiniń de ǵalymdary tujyrymdap otyr. Sondyqtan 18-den 65 jasqa deıingi azamattar óziniń qyzmetine baılanysty, ıaǵnı medıtsına qyzmetkeri, pedagog syndy koronavırýsqa qarsy vaktsına alý sanatyna jatatyn maman bolsa, onda olar koronavırýspen aýryp, emdelse de vaktsına alǵany durys. Óıtkeni, olar vaktsınatsııadan keıin aǵzada paıda bolatyn ımmýnıtet arqyly densaýlyǵyn qorǵaı alady», - dedi ol Ortalyq kommýnıkatsııalar qyzmetindegi baspasóz máslıhatynda.